د روژې مبارکې میاشتې له پیل نه تر اوسه پورې د غزني ولایت د پولیسو ۴ تنه کارکوونکي ترور شوي دي.
د غزني والي ویاند شفیق الله ننګ ساپي سلام وطندار ته په خبرو کې د دغو ترورونو د زیاتېدو پخلی وکړ او زیاته یې کړه، چې نن ورځ د (جون په ۲۱مه) د غزني د ښاروالۍ یو تن ساتونکی د موټرسایکل سپرو له خوا د دویمې حوزې په اړوند سیمه کې په ګولۍ ویشتل شوی دی.
د والي ویاند دا هم وویل، چې تېر ماښام د پولیسو د درېیمې حوزې په سیمه کې ۲ تنه امنیتي کسان د وسله والو تر برید لاندې راغلل، روغتون ته تر لیږدولو وروسته مړه شول.
ورته وخت کې د غزني ولایت د پولیسو قومندانۍ د امنیت امر سلام وطندار ته وویل، چې د پولیسو قومندانۍ یو تن پولیس، د روژې میاشتې په پیل کې د غبرګولي په ۲۸ په ډزو ووژل شو.
د والي ویاند او امنیتي مسولین وايي، چې تر دې مهال یې د دې ترورونو پر تړاو کومه ډله نه ده نیولې.
دوی وايي، چې دغه ترورونه ډېر د بې غږه تومانچو نه په واسطه شوي دي.
د تېر کال د روژې په مبارکه میاشت کې له ۱۵ تنو زیات د غزني ښار اوسېدونکې د بې غږه تومانچو په وسیله ترور شوي وو.
