د عامې روغتیا وزارت اعلان کړی چې په تېرو ۲۴ ساعتونو کې د ۷۹۳ کسانو د کورونا پایلې مثبتې ختلې دي.
د دغه وزارت د عامه اړیکو مسوول سعیدالدین جامي وايي چې د دغو شمېرو په ثبت سره په هېواد کې پر کورونا د اخته کسانو شمېر ۲۶ زره ۳۱۰ ته ورسېده.
د نوموړي په وینا، په تېره یوه شپه او ورځ کې د کورونا ۳۸۱ ناروغ بېرته روغ شوي او ۱۳ نورو خپل ژوند له لاسه ورکړی دی.
د روغتیا وزارت د شمېرو له مخې، تر اوسه ۴۹۱ کسان د کورونا ویروس له کبله مړه شوي او ۵ زره ۵۰۸ نور بېرته رغېدلي دي.
تر اوسه په نړۍ کې له ۸ میلیونه او ۱۱۳ زرو نه ډېر کسان پر کورونا ویروس اخته شوي چې له ډلې یې ۴۳۹ زره هغه مړه شوي او له ۴ میلیونه او ۲۱۳ زرو نه ډېر بېرته روغ شوي دي.
