د غزني د نشهيي توکیو پر وړاندې د مبارزې ریاست په دغه ولایت کې پر نشهيي توکیو د روږدو کسانو ډېروالی د اندېښنه وړ بولي او وايي، د ګڼو ټولنیزو ستونزو لامل شوي دي.
په غزني کې د نشهيي توکیو پر وړاندې د مبارزې رییس عنایتالله رفعت وايي، که څه هم په دغه ولایت کې کوکنار نه کرل کېږي، خو ناامني د دې لامل شوي چې روږدي کسان په اسانۍ سره د اړتیا وړ توکي ترلاسه کړي.
نوموړی زیاتوي، په غزني کې د روږدو کسانو د درملنې مرکزونه کم دي او پهکار ده چې ډېر یا هم اوسنی هغه سل بستریزه شي او پرسونل یې زیات شي.
په همدې حال کې د غزني اوسېدونکي اسلامالدین او رحیمالله وايي، پر نشهيي توکیو روږدو کسانو په ښار کې د غلاوو ترڅنګ په ګڼو جنايي پېښو کې لاس لري.
د دوی په وینا، روږدو کسانو نه یوازې په ښار کې ټولنیزې ستونزې جوړوي، بلکې نوي ځوانان هم په نشهيي توکیو روږدي کېدو ته هڅوي.
خو د غزني د عامې روغتیا رییس طاهرشاه نېکمل وايي، تېر کال یې له ۸ سوو ډېرو روږدو کسانو درملنه کړې او هره میاشت د روږدو کسانو په ځانګړي روغتون کې د ۵۰ تر ۶۰ روږدو کسانو درملنه کوي.
نوموړی له اړوندو دولتي ادارو او مرستندویه بنسټونو غواړي چې پر نشهيي توکیو د روږدو کسانو تر درملنې وروسته د هغوی لپاره د کار اسانتیاوې برابرې کړي، کهنه په وینا یې، ښايي تر درملنې وروسته، بېرته نشهيي توکیو ته مخه کړي.
په غزني کې پر نشهيي توکیو د روږدو کسانو ډېره برخه ځوانان جوړوي. دغه ځوانان وايي، له روږدو کسانو سره تر ناستې ولاړې وروسته دوی هم پرې روږدي شوي او اوس له ګڼو ستونزو سره مخ دي.
