ځایي روغتیایي چارواکي وايي، چې په پام کې ده په هلمند ولایت کې شاوخوا ۷ سوو زرو ماشومانو ته په دغه پړاو کې د ۴ زرو واکسیناتورانو له لوري د پولیو واکسین ورکړل شي.
د هلمند د عامې روغتيا رياست د کتلوي معافيت امر ډاکترعبدالاحد حازم د يکشنبې په ورځ (۲۰۱۵ زېږدیز/ ۱۰ مې) د واکسين کمپین د پېل پرمهال خبريالانو ته وويل، که څه هم په دغه ولايت کې اوس د پوليو ناروغي ترکنټرول لاندې راغلې، خو بيا هم په دې وروستيو کې په خانشين ولسوالۍ کې د ګوزڼ يوه مثبته پيښه ثبت شوې چې یو ۷ کلن ماشوم یې فلج کړی دی.
نوموړي زياته کړه، چې "موږ تر خپله وسه پورې کارکوو، خو یوه مثبته پېښه اوس ثبت شوې ده" د نوموړي په وينا دغه پېښه د ناامنيو له امله رامنځ ته شوې، ځکه واکسيناتوران هلته نه شي تلی او ماشومان د واکسین څخه محروم پاتې شي.
د ده په وينا همدا اوس د یاد ولایت په نهر سراج کې هم ورته پېښې شته، خو هيله من دی، چې ځايي اوسېدونکي به د له منځه وړلو له پاره ورسره مرسته وکړي.
له بله پلوه د نیمروز والي امیرمحمد اخندزاده د پولیو کمپین د شروع کېدو پرمهال سلام وطندارته وویل، چې دغلته به د پنځو ولسوالیو ماشومانو ته د پولیو واکسین ورکړل شي.
نوموړي زياته کړه، چې" شاوخوا ۷۲ زرو ماشومانو ته به د پولیو واکسین او د چینجي ناروغي درمل ورکول پېل شي."
سره له دې، چې افغانستان ډېرو سیمو کې اوس د پولیسو ناروغي ریښې ایستل شوي، خو لاهم په ځینو ناامنه سیمو کې د واکسین کمپین نه تطبیق له امله د پولیو مثبتې پېښې لیدل کیږي.
