د کندوز ځايي مسوولان په خاناباد ولسوالۍ کې د سړک غاړې د ماين چاودنې خبر ورکوي.
د کندز د خاناباد ولسوال حیات الله امیري د ياد خبر په تاييد سره وايي، پېښه تېر ماښام د خاناباد ولسوالۍ په جنګل باشي سیمه کې شوې او په کې د روز مزد کارګرانو زرنج موټر سایکل د سړک غاړې پر ماین ختلی او له کبله یې ۷ کارګران وژل شوي او ۶ نور ټپيان دي.
اميري وايي چې د پېښې سیمه د طالبانو تر کنټرول لاندې ده او د پېښې قربانیان د بدخشان ولایت د ارګوی ولسوالۍ اوسېدونکي دي چې له بدخشانه کندوز ته کرنيزو کروندو کې کار کولو لپاره راغلي وو.
نوموړی زیاتوي چې ټپیان روغتون ته لېږدول شوي خو د ۲ ټپيانو روغتیايي حالت نازک دی.
له دې سره د کندوز د والي وياند عصمتالله مرادي وايي چې ياد ماين د طالبانو له لوري ځای پرځای شوی و.
طالبانو تر اوسه پورې په دې اړه رسنيو ته څه نه دي ويلي.
