د غور ولايت سلګونه اوسېدونکيو چې په هرات ولايت کې اوسېږي، دې لپاره چې د ۱۳۹۹ مالي کال په بوديجه کې د مرکزي ولايتونو د لويو لارو سړکونو جوړولو لپاره بوديجه نه ده ځانګړې شوې، لاريون وکړ.
معترضانو د هرات ولايت د سيمهييزې ادارې ودانۍ مخې ته په يوه راټولېدنه کې د حکومت مرکزي اداره له غوريانو سره پر دوهګوني چلند تورنه کړه.
دوی خبرداری ورکړ، که حکومت يې غوښتنو ته پام ونه شي، خپل اعتراضونه به نورو ولايتونو ته هم وغځوي.
دوی ادعا کوي چې حکومت په تېره يوه نيمه لسيزه کې غور ولايت ته هېڅ پام نه دی کړی او د دې ولايت د اوسېدونکيو سره يې دوهګونی چلند کړی دی.
د غور والي غلامناصر خاضع وايي، د معترضانو غوښتنې د حکومت مرکزي ادارې سره شريکې کړې دي او هيله شته چې د کابل- غور لويې لارې لپاره بوديجه ځانګړې شي.
د دې ولايت د اوسېدونکيو د نن ورځې د لاريون اساسي غوښتنې د غور – کابل د لویې لارې جوړول او د پوزهلېچ برېښنا پروژې بشپړول شامل دي.
