ناتو باش کاتبی ینس استولتنبرگ نینگ ایتیشیچه، اوشبو تشکیلات کرونا ویروسی‌گه قرشی کوره‌شیش خصوصیده امنیتی کوچلر و افغانستان نهادلریدن حمایت قیله‌دی. اونینگ ایتیشیچه، ناتو افغانستانده‌گی فعالیت و ماموریت‌لریده کرونا ویروسینی نظرگه آله‌دی.
ناتو باش کاتبی نینگ ایتیشیچه، اوشبو تشکیلات افغانستان‌لیک همکارلری نینگ یاردمی بیلن کرونا ویروسینی کنترل قیلیش خصوصیده اساسی برنامه‌لرنی قولگه آلگن. اونینگ کوپه‌یتیریشیچه، کیسکین حمایه‌وی کوچلر ینگی‌لیکده نورستان ولایتیده جایلشگن پولیس کوچلریگه ساغلیک تجهیزات و محافظتی لوازم‌لر یاردم بیرگن.
ناتو باش کاتبی اوشبو صحبت‌لرنی اوتگن کونی ویدیوی بیر ییغین آرقه‌لی ژورنالیست‌لرگه بیان قیلگن. اونینگ ایتیشیچه، افغانستانده جایلشگن کیسکین حمایه‌وی کوچلردن بیرقطاری کرونا ویروسی‌گه چلینگن‌لر و ناتو تشکیلاتی اولرنی اوشبو مملکتدن چیقاریب و یا-ده قرنطینه‌گه آلگن.
ناتو باش کاتبی نینگ کوپه‌یتیریشیچه، اوشبو تشکیلات کرونا ویروسی‌گه قرشی کوره‌شیش و ساغلیک تجهیزات‌لرنی تیارلش خصوصیده افغانستان امنیتی کوچلریگه یاردم بیره‌دی و بو ویروس‌گه قرشی کوره‌شیش اوچون افغانستان امنیتی کوچلریگه تعلیم و مصلحت بیره‌دی.
استولتنبرگ نینگ ایتیشیچه، کیسکین حمایه‌وی کوچلر افغانستان امنیتی کوچلری و نهادلریدن حمایت قیلیش خصوصیده تعهدلی دیر و انه‌شو سبب اوشبو مملکتده تینچلیک تامین‌لنیشی اوچون سعی و حرکت قیله‌دی.
ناتو باش کاتبی نینگ ایتیشیچه: «ناتو، آمریکا و طالبان آره‌سیده امضا ایتیلگن شرطنامه‌دن حمایت قیلگن و حاضرده افغانستانده بولگن حربی‌لریمیزنی 16 مینگ‌دن 12 مینگ‌گه کمه‌یتیریلیش موضوعی‌نی تنظیم قیلماقده‌میز.» اونینگ کوپه‌یتیریشیچه: « بوندن آلدین هم بیلدیرگن‌میز کیم، کوچلریمیزنی شرط اساسیگه کمه‌یتیره‌میز و افغانستان امنیتی کوچلریگه مصلحت، تعلیم و یاردم بیریش خصوصیده تعهدلی میز.»
ینس استولتنبرگ نینک تاکید قیلیشیچه، ناتو نینگ افغانستانده‌گی حربی‌لرینی سانی 12 مینگ‌گه کمه‌یگن صورتده هم اوشبو تشکیلات فعالیت‌لریگه دوام بیره آله‌دی.
اونینگ کوپه‌یتیریشیچه: «ناتو نینگ پیامی شو دیرکیم بیز بیرلیککه افغانستان‌گه بارگن‌میز، بیرلیککه قرار آله‌میز و شرایط مساعد بولگن صورتده، بیرلیککه افغانستاندن چیقه‌میز.»
ناتو باش کاتبی نینگ ایتیشیچه، تینچلیک سعی و حرکت‌لردن حمایت قیلیش اوچون افغانستان امنیتی کوچلریدن حمایت قیلیش اساسی یول دیر. اونینگ ایتیشیچه، طالبان گروهی اوروش میدانی‌گه موفق بولمه‌یدی و واقعی مصالحه اوچون سوزلشوولرگه حاضر بولیش‌لری کیره‌ک.
اونینگ افغانستانده بولگن سیاسی تارتیشوولر خصوصیده ایتیشیچه: «افغانستان حکومتی ایچیده بولگن قیین‌چیلیکلر هم اونملی دیر. تینچلیک لایحه‌سیده کامل صورتده، شرکت قیلیش اوچون افغانستانده بیرلیککه نیازیمیز بار.»
استولتنبرگ نینگ ایتیشیچه، کیسکین حمایه‌وی کوچلر مصلحتی و تعلیمی لحاظ دن افغانستان امنیتی کوچلریدن حمایت قیله‌دی و ناتو انه‌شو یول‌لر آرقه‌لی، زوروانلیک‌نی کمه‌یتیریش اوچون طالبان گروهی‌گه فشار کیلتیره‌دی و آمریکا اونینگ چکه‌سیده بو تشکیلات آرقه‌لی طالبان‌گه فشار وارد قیله‌دی.
اونینگ ایتیشیچه: « بیز طالبان گروهی‌دن زوروانلیک‌لرنی کمه‌یتیریشی‌نی ایسته‌یمیز و کامل صورتده، تینچلیک لایحه‌سیگه سهیم بولیش‌لرینی طلب قیله‌یمز. بیز یالغیز ایتمه‌یمیز بیلکیم افغانستانده حضوری‌میز بیلن عمل قیله‌میز و افغانستان امنیتی کوچلریدن حمایت قیله‌میز.»
ناتو باش کاتبی ایکی کون آلدین هم طالبان گروهی‌دن هجوم‌لرینی توخته‌تیب و آمریکا بیلن امضا قیلگن شرطنامه‌نی کامل صورتده، عملگه آشیریشینی سوره‌گن ایدی.
