سونگی هفته‌لرده مملکت ایریم ولایت‌لری اینقسه کابل نینگ امنیتی وضعیتی یمان بولگن و یوز بیرگن تروریستی واقعه‌لر نتیجه‌سیده، کوپ قطار تینچ اهالی هلاک ایتیلیب و یره‌لنگن‌لر.
نیچه پیت آلدین کابل غربیده جایلشگن بیرهوتل‌ده یوز بیرگن خودکش هجوم نتیجه‌سیده، 80 کیشی هلاک ایتیلیب و باشقه کمیده 200 کیشی یره‌لنگن دیر.
باشکنت یشاوچی‌لری نینگ ناتینچلیکلردن خواطر بیلدیریب ایتیشیچه، ناتینچلیک‌لر اولر اوستیگه سلبی تاثیر قویگن و تینچ فضاده تیریک‌چیلیک قیله آلمه‌یدیلر.
کابل کسبه کارلریدن بیری غوث‌الدین نینگ ایتیشیچه، کابل امنیتی وضعیتی خواطرلنترووچی دیر.
غوث‌الدین نینگ ایتیشیچه، جمهور رییس غنی، امان‌الله خان نینگ برنامه‌لرینی عملی قیلیشیدن وعده بیرگن، بیراق حاضرده کون اوتیش بیلن ناتینچلیک‌لر سبب، تینچ هالی قربان بوله‌دی.
فاریاب یشاوچیلریدن بیری سهراب نینگ ایتیشیچه، بو ولایتده امنیتی وضعیت کون اوتیش بیلن یمان بولماقده و ایرکین شکلده شهرده کسبه‌کارلیک قیله آلمه‌یدیلر.
عین‌حالده، ننگرهار یشاوچیلریدن بولمیش امین‌الله نینگ ایتیشیچه، جلال آباد شهریده بیر کونده نیچه پارتلش یوز بیردی و بو وضعیت خواطرلنترووچی دیر.
بیراق، ایچکی ایشلر وزیرلیگی سوزلاوچیسی نصرت رحیمی نینگ ایتیشیچه، مملکت دشمن‌لری قطار ولایتلرده هجوم‌لرینی کوپه‌یتیریش بیلن تینچلیک سوزلشوولریده امتیاز قولگه کیریتیش اوچون سعی و حرکت قیله‌دی.
جناب رحیمی‌گه کوره، امنیتی و استخباراتی کوچلر مملکت تورلی منطقه‌لریده تروریستی گروه‌لر هجوم‌لریگه توسیق بولیش اوچون سعی و حرکت قیله‌دی.
قطر باشکنتی دوحه شهریده آمریکا و طالبان نماینده‌لری آره‌سیده بولگن تینچلیک سوزلشوولرنینگ 9- دوری یولگه قویلیشی اوچون قرار قیلینگن بیر چاغده، مملکت‌ده ناتینچلیک‌لر کوپیب بارماقده.
