.jpg)
بغلان والیسینینگ سوزلاوچیسی محمود حقملنینگ سلاموطندارگه ایتیشیچه، بوگون «چهارشنبه» ایرتهلب قوراللی طالبلر دندشهابالدین منطقهسیده باشقه ایکی برق پایهسینی ییقیتگن.
جناب حقملنینگ ایتیشیچه، اوشبو پایهلر تاجیکستاندن کیلهدیگن 70 میگاوات برقنی کابل انتقال بیرردی و بوندن کیین، کابل یشاوچیلری نامعلوم پیتگچه تاجیکستاندن آلیب کیلینهدیگن برقدن محروم بولیشلری ممکن.
شونینگدیک بوندن آلدین، قوراللی طالبلر اوزبیکستاندن کیلهدیگن برقنی تورت پایهسینی دندشهابالدین منطقهسیده ییقیتیب پایتخت یشاوچیلرینینگ قارانغولیککه قویگن ایدی.
ایتیلیشیچه، قوراللی طالبلر افغانستان دولتینی آگاهلنتیریب، دندشهابالدینگه برق ترقهتیلیب، دندغوریده حربی عملیات توختهتیلیب و اوشبو منطقهدن دولتی کوچلر چیقاریلمهگن صورتده، باشقه برق پایهلرینی بوزیشینی ایتگن ایدی.
بغلانده محلی رسمیلرنینگ ایتیشیچه، اولر دندغوریده یولگه قوییلگن 20 خورشید عملیاتی یکونلنگونگه قدر، دندشهابالدین منطقهسیده باشقه عملیات یولگه قویهآلمهیدی.
دندغوری منطقهسیدن قوراللی طالبلرنی تازهلش اوچون 15 کوندن بویان کینگ حربی عملیات یولگه قوییلگن؛ بیراق حاضرگهقدر اوشبو عملیات نتیجهسیز بولیب و حکومت بو عملیاتنی یکونلنتیرهآلمهگن.
