قوراللی طالبلر ینگیلیکده بیر گزارش ترقهتیب، ملاعمرنینگ کته اوغلی مولوی محمد یعقوب مجاهد و ایناغهسی ملا عبدالمنان عمریگه ینگی حربی وظیفه تاپشیریلگنیدن خبر بیرهدی.
مذکور گزارشده کیلیشیچه، مولوی مجاهد اسلامی امارت رهبرلیک کینگشینینگ عضوی و شونینگدیک، افغانستاننی 15 ولایتیده حربی کمیسیون مسؤولی صفتیده تعیین ایتیلگن. عین حالده، ملا عبدالمنان عمری، رهبرلیک کینگشینینگ عضوی و ارشادو دعوت کمیسیونینینگ مسؤولی صفتیده تعیین ایتیلگن.
بو گزارش اوتگن (دوشنبه کون) قوراللی طالبلرگه تیگیشلی شهامت سایتیده نشر قیلینگن.
سیاسی ایش بیلرمانلر، اوشبو تعیین ایتیشلرنی قوراللی طالبلرنینگ سابق رهبری ملاعمرنینگ عایلهسینی حمایتی و رضایتی جلب ایتیلیشی و شونینگدیک، مذکور گروهنینگ ایچیدهگی قرهمه قرشیلیکلرنی حل ایتیش دیب بیلهدی.
سیاسی ایش بیلرمان وحید مژدهنینگ سلاموطندارگه ایتیشیچه، مولوی یعقوب پاکستاننینگ کراچی شهریده بیر دینی مدرسهده تعلیم کورگن؛ بیراق حربی ایشلر خصوصیده تجربهسی یوق. شونینگدیک ملا عبدالمنانگه بیریلگن وظیفه توغریسیده جناب مژدهنینگ ایتیشیچه، او، قوراللی طالبلرنینگ تورکومیده چیتده نقش اوینهگن و بیریلگن وظیفهسی هم نمایشی بولگن.
جناب مژده، طالبلرنینگ ینگی تعیین ایتیشلریگه اشارهقیلیب ایتیشیچه، قوراللی طالبلرنینگ باشلیغلریدن بیرقطاری، ملاعمرنینگ عایلهسی ملا منصور رهبرلیگیگه بولگن طالبان گروهیدن اوزاقلهشی خصوصیده خواطر بیلدیرهدی؛ انه شو سبب، مذکور عایلهنینگ حمایتینی جلب ایتیش اوچون سعی و حرکت قیلهدیلر.
شونینگدیک، اوشبو ایش بیلرماننینگ ایشانچیگه کوره، قوراللی طالبلرنینگ تعیینات تیزیمی، افغانستان تینچلیگی و اوروشی اوستیگه تأثیر تشلمهیدی.
عین حالده، طالبلرنینگ ینگی تشکیلاتی توغریسیده مملکت مدافعه وزیرلیگینینگ سوزلاوچیسی اورین باسری جناب رادمنشنینگ ایتیشیچه، اوشبو تعیینات تبلیغدن باشقه هیچ نرسه بولمهی، یالغیز خلق فکرینی چلغیتهدی. جناب رادمنشنینگ کوپهیتیریشیچه، قوراللی طالبلرنینگ بو حرکتی افغانستان حربی کوچلرینینگ لایحهسی و مقصدلری اوستیگه هیچ قندهی تأثیر تشلمهیدی.
جنرال رادمنشنینگ ایتیشیچه، افغانستان امنیتی کوچلری، ینگی اوروش موسومی اوچون ییترلیچه تیارگرلیک آلگن و ینگیلیکده مملکت بویلب «شفق» ناملی کینگ حربی عملیات یولگه قوییلهدی.
قوراللی طالبلرنینگ ینگی گزارشی، کمیده ایکی هفته آلدین، امنیتی رسمیلر نمایندهلر کینگشیده حضور کیلتیریب، قوراللی طالبلر ینگی اوروش موسومی اوچون تیارگرلیک آلیب و قتیق هجوملر ریجهلشتیریشینی ایتگن بیرچاغده، نشر ایتیلگن.
