بادغیس محلی رسمی‌لری‌نینگ ایتیشیچه، مملکت غربیده بالامرغاب تومنی کاریز حاجی نظر، قادس تومنی، جوند تومنی کوچۀ درزک، مقر تومنی کولاری منطقه‌لری، هرات ولایتی اوبه تومنی و فاریاب ولایتی غورماچ تومنی یوللری طالبلر قومندانلیگی و تشکیلات مرکزلری‌گه اوزگرگن.
بادغیس ولایت کینگشی باشلیغی بهاؤالدین قادسی‌نینگ سلام‌وطندارگه ایتیشیچه، طالبلر اوشبو منطقه‌لرده 500 کیشی‌لیک کینگ توپلم تشکیل ایتیب و هجوم‌لرینی ریجه‌لیدی. جناب قادسی‌گه کوره، فاریاب ولایتی‌ده تازه‌لش عملیات اوتکزیلگنی‌دن کیین، طالبلر بادغیس تومنلریده جایلشگن.
جناب قادسی‌نینگ ایتیشیچه، طالب‌لرنینگ حربی جهازلری و کوپینچه ولایت‌لرده عمل‌گه آشیره‌دیگن هجوم‌لری اوشبو منطقه‌لردن ریجه‌لنه‌دی.
بادغیس ولایت کینگشی باشلیغی‌نینگ آگاه‌لنتیریشیچه، مرکزی حکومت طالبان مرکزینی نابود ایتیش اوچون چاره تدبیر کورمه‌گن صورتده، اوشبو ولایت امنیتی تهدیدلری کوپه‌ییب و بادغیس تومن‌لریدن بیرقطاری تیزلیک‌ده سقوط ایتیشی ممکن.
اجراییه ریاستی بیرینچی اورین باسرلیگی مطبوعات آمری ضیاالحق فیروزکوهی، بادغیس ولایتی‌ده مدیریت کوچسیزلیگی و شونینگ‌دیک فاریاب ولایتی‌ده اوتکزیلگن عملیات‌لرنی بادغیس ولایتی چیگره‌یی تومنلریده طالبلر هجومی‌گه سبب بولگن دیب بیله‌دی. اونینگ ایتیشیچه، امنیتی تهدیدلر بالامرغاب، مقر، جوند و آب‌کمری تومنلریده ایلگریدن کوپراق بولگن.
بادغیس پولیس قومندانلیگی سرپرستی و امنیت آمری عبدالعزیز امانی، بالامرغاب و جوند تومنلریده طالبلر موجودلیگینی تأیید قیله‌دی، بیراق ایتیشیچه، اولرنینگ حضوری خواطرلی ایمس دیر. جناب امانی‌نینگ ایتیشیچه، اوشبو ولایت طالب‌لری افغانستان امنیتی کوچلری‌گه قرشی کوره‌شه آلمه‌یدی.
بادغیس ولایتی امنیتی وضعیت توغری‌سیده‌گی خواطرلر شونده‌ی بیرحالده بیان ایتیله‌دی کیم، نیچه آی آلدین مذکور ولایت بالامرغاب تومنی طالبلر قولیگه اوتکن ایدی، بیراق امنیتی کوچلر قیته‌دن مذکور تومن‌نی طالبلر قمراویدن چیقاریش‌گه مؤفق بولگن.
