افغانستان جمهور رییسی محمد اشرفغنی هراتگه قیلگن سفری جریانیده شیندند ولسواللیگی اوچ بولینیشینی ایتگن. جمهور رییس غنی بوگون بیر رسمی سفر بیلن هرات بارگن ایدی.
او، ملی کوچلر و قوم یاش اولوغلری بیلن ملاقات قیلگن. جمهور رییسنی هراتلیکلر حضوریده ایتیشیچه، مذکور ولایت نینگ ییریک ولسواللیگی شیندند اوچ بولیم گه اجره تیلهدی. بوندن آلدین جمهور رییس غنی هراتگه قیلهجک سفریده مذکور ولسوالیکنی ولایت سویهسیگه کوتاریشی کوتیلردی.
شونینگدیک جمهور رییس غنی ولایتنینگ مسووللریگه شیندند اوچ بولینیشی اوچون مخصوص برنامه بیریشلرینی وسورهگن. هراتنینگ جنوبیده جایلشگن شیندند ولسواللیگی افغانستاننینگ ییریک ولایتلریدن سنهلهدی.
بو ولسواللیک اوتگن پیتلرده نا برقرار ولسواللیکلر جملهسیدن بولگن. بو ولسواللیکنینگ ایریم حدودلریده دولت قوراللی مخالفلری نینگ فعالیتی شیندندلیکلرنینگ دایمی تنقیدیگه سبب بولیب کیلگن. ایتیلیشیچه، افغانستان جمهور رییسی هراتگه قیلگن سفری جریانیده محمد اسماعیل بیلن اوچرهشیشی کوتیلهدی.
قربان بولگن عسکرلرگه مالی کومک میزانی آشیریلهدی
جمهور رییس غنی بوگون ایرتلب هرات ولایتیده 207 – ظفر قول اردوسینینگ حربیلری بیلن اوچرشدی.
جناب غنی، ملی کوچلرنی نابرقرارلیکلرگه قرشی آلیب بارهدیگن کورهشیشلرینی آلقیشلهگن. جمهور رییس غنی بوندن بویان عسکرلرنینگ آیلیگی ایکّی برابرگه آشیریلیشی اوچون فرمان بیرگن.
بوندن آلدینهم سابق حکومت جنگده قربان بولهدیگن عسکرلر عایلهسیگه یوز مینگ افغانی بیرردی. شونینگدیک جمهور رییس غنینینگ ایتیشیچه، اوروش افغانستان اوچون تحمیل ایتیلگن و بو مملکت تحمیل قیلینگن اوروش برابریده کورهشیشی حتمی.
عین حالده، جناب غنی افغانستان حکومتی هیچ بیر زمان کوچسیز موقفدن توریب دولت قوراللی مخالفلری بیلن تینچلیک مذاکرهگه اولتیرمس لیگینی ایتگن.
روندسبز همده افغانستان سابق ملی خوفسیزلیک رییسی امرالله صالح بو تدبیرنی تقنید آستیگه آلیب اوز فیس بوک صحیفهسیگه یازیشیچه، بوندهی بیر شرایطده مملکت ملی کوچلریگه آتشین گپیریش، انگیزه بیریش و برنامه بیریش لازم دیگن.
جناب صالح گه کوره، جمهور رییس غنی عسکرلر قانی مقابلیده پول توله نیلهدی دیگن. شونینگدیک جمهور رییس سوزلرینی تنقید قیلگن سیاسی تحلیلچی جاوید کوهستانینینگ سوزلریگه کوره، جمهور رییس غنی توشینمسدن توریب ملی کوچلرگه روحیه بیرگن. غنینی سوزلرگه کوره، قربان بوله دیگن هر بیر عسکر قانی مقابلیده پول بیریلهدی. بوگون افغانستان وزیرلر کینگشیده سوزلهگن اجراییه رییسی عبدالله عبدالله، مملکت خلقی اوروشدن بیزار بولگنلر دیگن.
اونگه کوره، حکومت هر بیر آدیمده افغانستان ملی منفعتلرینی نظرده توتهدی. افغانستان دولت قوراللی مخالفلری بیلن حکومت اورتهسیده تینچ لیک مذاکرهلر باشلهنیشی کوتیلردی و پاکستان هم بو جریانگه یاردم بیریشدن سوز بیرگن ایدی.
اما، هنوز گچه هم تینچلیک مذاکرهلرنینگ نتیجهسی انیق ایمس. جمهور رییس غنی پاکستان رسمیلریگه یوللگن نامهسیده تینچ لیک مذاکرهلرگه عملده همکارلیک قیلیش اوچون بیر آی مهلت بیرگن.
