هراتلیک محبوسلرنینگ قرینداشلری اوتکن (شنبه کون) ناراضیلیک نمایش اوتکزیب حکومتدن کابلده بگرام و پلچرخی تورمهخانهلریدهگی هراتلیک محبوسلرنی هرات تورمهخانهسیگه یوباریشینی سورهگن. اوشبو ناراضچیلر سانی کمیده ایکی یوز کیشیگه ییتیشب، «بیزلر محبوسلر یوباریلیشینی ایستهیمیز» دیب شعاری بیریب هرات ولایتی بناسی اونگیده توپلنگنلر.
محبوسلر عایلهسینینگ ایتیشیچه، نیچه ییلدن بویان قرینداشلریدن خبری یوق و اقتصادی قیینچیلیک باعث، اولر بیلن اوچرهشیش اوچون کابلگه سفر قیله آلمهیدی. اوشبو عایلهلردن بیرقطاری سلاموطندار بیلن اوتکزگن صحبتیده ادعاقیلیشیچه، محبوسلردن بیرقطاری یالغیز اوغیرچیلیک جرمیگه عیبلنیب پایتختدهگی بگرام و پلچرخی تورمهلریگه یوباریلگن، دیمک تورت ییللیک حکمی تولگن و حاضرگچه قوییب یوباریلیشیدن خبر یوق دیر.
کابلدهگی محبوسلردن بیرینینگ 52 یاشر آنهسی پریگلنینگ ایتیشیچه، اوغلی قوی اوغیریلشگه عیبلنیب تورت ییلدن بویان پلچرخی تورمهسیده حیات کیچیرهدی. پریگلگه کوره، اوغلی یوقلیگیده اون کیشیلیک عایلهسیگه اوزی نان تاپهدی و بوندن آرتیق اقتصادی قیینچیلیککه چیده آلمهیدی.
اعتراضچیلر، محبوسلر خصوصیده حکومتنی دقت سیزلیککه عیبلب ایتیشیچه، کابل تورمهلریده هراتلیک محبوسلرنینگ حقی بیریلمهیدی.
بیراق هرات والیسی سوزلاوچیسی احسانالله حیاتنینگ ایتیشیچه، اعتراضچیلر ایستهگی هرات محلی ادارهسیگه باغلیق ایمس. جناب حیاتگه کوره، مرکزی دولت رسمیلری محبوسلرنی کابلدن هراتگه یوباریشی خصوصیده قرار آلیشی کیرهک.
باشقه تاماندن، هرات مرکزی تورمه مدیری عبدالله عزیزینینگ سلاموطندارگه ایتیشیچه، قانون اساسیده، آغیر جنایتگه عیبلنگن محبوسلر، اساسی شکلده امنیتی آلینگن تورمهلرگه یوباریلهدی. جناب عزیزینینگ کوپهیتیریشیچه،هراتلیک محبوسلر جمهور رییس و امنیتی کینگش بویروغی اساسیده، بگرام و پلچرخی تورمهلریگه یوباریلگن.
محبوسلر عایله اعضاسینینگ ناراضیلیکلری شوندهی حالده یولگه قوییلهدی کیم، انچه پیت آلدین هرات ولایتیدهگی محبوسلرنینگ یقینلری، عدلی و قضایی ادارهلریده فساد موجودلیگی و محبوسلر دوسیهسی تیزلیکده تیکشیریلمهگنی خصوصیده ناراضیلیک بیلدیرگن ایدی.
