پکتیا ولایتینینگ دندپتان ولسواللیگیده نیچه کوندن بیری قوراللی طالبلر و ملی کوچلر اورتهسیده یوز بیرگن اوروش هنوز هم دوام ایتماقده.
مملکت جنوب شرقی 402چیگره زون قوماندانی عبدالبصیر اخپلواکنینگ سلاموطندارگه ایتیشیچه، افغان ملی کوچلری اوتگن کون (پنجشنبه) دن حاضرگچه مذکور ولسواللیکده طالبلرگه قرشی قوشمه حربی عملیات باشلنگن.
جناب اخپلواکنینگ سوزلریگه کوره، توقنشوولر جریانیده هنوزگچه 70 جنگری اولدیریلگن و اونلب عصیانچی تن جراحتی آلگن.
جنوب شرقدهگی 402 چیگره قوماندانیگه کوره، اوروشده افغان ملی کوچلریگه هم تلفات ییتگن، اما او بو توغریده انیق معلومات بیرمهگن.
عین حالده قوراللی طالبلر عاموی اخبارات واسطهلرگه پیام یوللب اوروشده افغان ملی کوچلرینینگ ییریک حربی قرارگاهسینی اوتگه یاندیرگنلیکلرینی معلوم قیلگن.
جاری ییل باشلهنیشی بیلن جنگری طالبلرنینگ مملکت ایریم ولایتلریده هجوملری باشلنگن. ینگی موردده مذکور گروه بوگون ایرتلب (جمعه) بدخشان ولایتینینگ راغستان ولسواللیگیگه هجوم قیلیب ساعتلب اوشبو ولسواللیکنینگ کته قسمی جنگریلر اشغالیگه اوتگن. عین حالده، مذکور ولسواللیک قیتهدن افغان ملی کوچلریگه تصرفیگه اوتگن.
