کنر ولایتی سرکانی تومنینینگ باروگی قیشلاقی یشاوچیلرینینگ بوگون ادعا قیلیب ایتیشلریچه، امنیتی کوچلر بیلن طالبلر اورتهسیده اوشبو تومنده امنیتی کوچلر تامانیدن آتیلگن بیر راکت یشش بنابلردن بیریگه کیلیب توشیش نتیجهسیده ۲ کیشی جان بیرگن و باشقه ۷ کیشی یرهلنگن.
یشاوچیلر بیر راکت ناراضیلیک نمایشی اوتکزیب جسدلرنی اوزلری بیلن بیرگه ولایت ساختمانی برابریده آلیب کیلگنلر و سلاموطندارگه امنیتی کوچلرنی تنقید قیلیب ایتیشلریچه، بوکوچلر طالبلرنی نابود قیلیش اورنیده تینچ اهالینینگ یشش بنالرینی هدف آلهدی. یشاوچیلرگه کوره، حادثهده بیر باله و بیر ایرکک جان بیرگن و اوچ باله و ایکی عیال ایسه یرهلنگن.
بیراق کنر عامه ساغلیق سقلش باشلیغی داکتر عزیزالله ساپینینگ ایتیشیچه، حادثه ییریدن ۴ کیشی یرهلنگن کسلخانه گه کیلتیریلگن.
کنر محلی رسمیلرینینگ ایتیشیچه، بوگون (پنجشنبه) ایرتهلب ساعت ۷ ده کنر سرکانی تومنی نینگ ایریم پوستهلریگه هجوم قیلگن و نیچه ساعت امنیتی کوچلر بیلن اوروشگنلر.
خبرنی تأیید قیلگن کنر والیسینینگ اورین باسری محمدنبی احمدینینگ ایتیشیچه، سرکانی تومنی نینگ باروگی قیشلاقیده بیر یشش بناگه راکت کیلیب توشیش نتیجهسیده ۲ تینچ اهالی عالمدن اوتگن و باشقه ۴ کیشی یرهلنگن و بو راکت کیم تامانیدن آتیلگنلیگی حاضرگه قدر انیق بولمهگن.
جناب احمدیگه کوره، اوروشده طالبلر امنیتی کوچلر اوستیگه یشش بنالردن اوق اوزگن و امنیتی کوچلر ایسه اوزلریدن دفاع قیلیش اوچون قرشی جواب بیرگنلر.
کنر والیسینینگ ایتیشیچه، سرکانی تومنینینگ باروگی قیشلاقیده طالبلر یوکسک فعالیت قیلیب کیلماقده، اما اوشندهی بولسه هم محلی ادارهلر حادثهنی تیکشیریش اوچون محلگه هیأت یوبارگن.
