ایرانلیک چیگرهچیلر هرات ولایتی کهسان ولسواللیگینینگ اهالیسینی هریرود دریاسیدن سوو آله دیگنده اوققه توتهدی.
ولایت محلی رسمیلرینینگ سلام وطندارگه ایتیشلریچه، هرات کهسان ولسواللیگینینگ ایریم یشاووچیلری هریرود دریاسیدن سوو آله دیگنده ایرانلیک چیگرهچیلر آرقهلی اوققه توتیلیب هلاک بولگنلر.
اوشبو خبرنی تصدیقلهگن هرات کهسان ولسواللیگینینگ ولسوالی نظامالدین رحمانینینگ ایتیشیچه، ایران بیلن قوشمه چیگرهگه ایگه کمانه و بنیان منطقهلرینینگ اهالیسی نیچه مرته ایرانلیک چیگرهچیلر تامانیدن آتیب اولدیریلگنلر. رحمانی، کهسان اهالیسیگه قرشی اوق اوزیشلر بهار و یازده کوپیشینی ایتگن. اوشبو فصللرده سوو تنقیسلیگیگه روپه ره بوله دیگن مذکور منطقهلرنینگ اهالیسی هریردو دریاسی سوودن فایدهلهنیشگه مجبور بولهدیلر.
رحمانیگه کوره، ایرانلیک چیگرهچیلر حتی بلاغتگه ییتمگه گودکلرنی هم نشانگه آلگن.
بو گزارشنی کهسان ولسواللیگینینگ امنیه قوماندانی میرجان هم تصدیق لهگن.
ولسواللیکنینگ قوم یاش الوغلری نیچه ییلدن بیری انه شوندهی قیینچلیکده ایکنلیکلرینی ایتگنلر. اولرنینگ ایتیشیچه، منطقهلریده شیرین سوو یوق، اوز دریالری سوویدن فایدهلنگن حالده، هم هجوم آستیگه آلینه دیلر.
عین حالده، مرغاب – هریردو دریالری حوزهسینینگ عمومی رییسی نجیبالله جوینینینگ بو بارهده خبری یوقلیگینی تیلگه آلیب ایتیشیچه، هلیگچه بو باره ده هیچ قندهی خبر کیلمهگن.
هرات ولایت سرپرستی اصلالدین جامی، بو توغریده اثباتلاووچی گزارش بولمه گنلیگینی تیلگه آلگن.
مذکور منطقه وضعیتی تیکشیریلیشی اوچون نیچه وقت آلدین هراتگه هیات یوباریلگن ایدی، هیاتلر 58 صحیفهلیک گزارشنی جمهور رییس غنیگه تقدیم قیلگنلر. گزارشده، کهسانلیکلر ایران چیگرهچیلری آرقهلی هجومگه آلینیشلری قید ایتیلگن. اما هنوزگچه حکومت بو مساله اوچون عکس العمل بیریلدیرمگن.
کهسان هرات ولایتی شمال غربی حدودی نینگ 116 کیلو مترلیگیده جایلشگن ایران و ترکمنستان بیلن چیگرهداش. هریردو دریاسینینگ سووی مذکور ولسواللیکدن ایران توپراغیگه آقهدی.
