افغانستان ملی خوفسیزلیک کینگشی نینگ اعلان قیلیشیچه، طالبان نینگ محبوسلریدن کمیده 900 تهسی قوییب یوباریلهدی.
مذکور کینگش سوزلاوچیسی جاوید فیصل نینگ اوز توییتر صحیفهسیده یازیشیچه، افغانستان حکومتی تینچلیک جریانیده مؤفقیت قولگه کیریتیش، آتیشکیسین دوام ایتیشی و افغانستانلیکلر ارا سوزلشوولر تیزلیککه باشلهنیشی اوچون طالبان نینگ محبوسلریدن کمیده 900 تهسینی قوییب یوبارهدی.
طالبان نینگ اوشبو محبوسلری بوگون «سهشنبه، 6- جوزا» حکومت نینگ قماقخانهلریدن قوییب یوباریلهدی.
حکومت حاضرگهقدر طالبان نینگ بیر مینگ دن آرتیق محبوسینی 100 کیشیلیک گروهلرده قماقخانهلردن قوییب یوبارگن.
طالبان نینگ محبوسلرینی قوییب یوباریش جریانی 20- حمل ده حکومت تامانیدن باشلندی و حاضرگهقدر مذکور گروه نینگ 1100 محبوسی حکومت نینگ قماقخانهلریدن قوییب یوباریلگن. بیراق، طالبان نینگ 900 محبوسی بوگون قوییب یوباریلهدی.
آمریکا و طالبان آرهسیده امضالنگن تینچلیک کیلیشوونامه اساسیده، طالبان نینگ 5 مینگ محبوسی افغانستان حکومتی نینگ قماقخانهلریدن قوییب یوباریلیشی کیرهک و طالبان گروهی هم خوفسیزلیک کوچلری نینگ 1000 محبوسینی قوییب یوبارهدی.
طالبان گروهی حاضرگهقدر حکومت نینگ محبوسلریدن 250 تهسینی قوییب یوبارگن، بیراق حکومت اولردن 170 تهسی نینگ کیملیگینی تصدیقلگن.
ایکی تامان آرهسیده محبوسلرنی قوییب یوباریش جریانی یکونلگنیدن سونگ، افغانستان حکومتی و طالبان نینگ آرهسیده تینچلیک سوزلشوولری باشلهنیشی گه قرار قیلینگن.
جمهور رئیس غنی ایکی کون آلدین طالبان نینگ محبوسلریدن 2 مینگ تهسی قوییب یوباریلیشی توغریسیده بویروغ بیردی. جمهورلیک ریاست سرایی، بو ایش دن مقصد طالبان تامانیدن آتیشکیسین اعلان قیلینگنی برابریده یخشی نیت کورسهتیش دیگن.
طالبان گروهی حکومت نینگ قرارینی خوش قرشیلهدی، بیراق اوشبو گروه نینگ 5 مینگ محبوسی قوییب یوباریلیشینی ایتگن.
