تخار ولایتیده جمعیت اسلامی همده گلبدین حکمتیار رهبرلیک قیلهدیگن حزب اسلامی طرفدارلری اورتهسیده اوروش یوز بیرگن لیگی خبر قیلیندی. ولایت نینگ محلی بند مرتبهلی رسمیلری، مذکور آتیشمه جریانیده اسلامی حزب نینگ قوماندانلریدن بیری جعمیت حزبیگه طرفدار 22 کیشینی اوققه توتیب اولدیرگن دیدیلر. بو شخصلرنینگ کوپینچهسی عبادت اوستیده اولدیریلگن لیگی ایتیلهدی.
سنا مجلسی نینگ اعضاسی افضل شامل نینگ سلاموطندارگه ایتیشیچه، حزب اسلامی طرفدارلری مخدر مادهنی قاچاق قیلهدیگن پیتده جمعیت اسلامی طرفدارلری آرقهلی توسیق یرهتیلگن بیر چاغده یوز بیرگن.
اونینگ سوزلریگه کوره، آتیشمهدن نیچه کون سونگ حزب اسلامی قوماندانلریدن بیری آمر بشیر قانت جمعیت اسلامی حزبی اعضالرینی عبادت اوستیده آتیب اولدیرگن. جناب شامل، آمر بشیرنینگ نفرلر حتی بالهلر و عیاللرگه هم شفقیت قیلمسدن اولرنی کلتکلهگن دیدی.
ولایت امنیه قوماندانی فقیر محمد جوزجانی اوروش اوتگن کون پایانیگه ییتدی دیگن. لیکن، حادثه نینگ اصلی سببی معلوم ایمس دیدی ولایت امنیه قوماندانی.
تخار پولیس قوماندانی مساله یاروتیلیشی اوچون منطقهگه هیات یوباریلگن دیدی.
ولایت والیسینینگ سوزلاووچیسی سنتالله تیمور، واقعه حزبلر اورتهسیدهگی ضدیتلردن کیلیب چیققن بولیشی ممکن دیگن.
بو توغریده جناب قانت فکرینی اورگهنیش اوچون آلیب بارگن سعی وحرکتلریمیز نتیجه بیرمهدی.
