تخار ولایتی نینگ خواجهغار، بهارک، چاهآب، ینگیقلعه تومنلری و تالقان اطرافی سونگی کونلرده جدی ناتینچلیکلرگه گواه بولگن. گزارشلرگه کوره، خواجهغار، چاهآب و بهارک تومنلری نینگ مرکزی جمهورلیک ریاست سیلاوی کونیده طالبان قولیگه سقوط قیلگن.
طالبان گروهی بهارک تومنینینگ تصرف قیلگنیدن سونگ، تالقان شهری نینگ 15 کیلیومترلیگیده ییقینلشگن؛ بیراق اوتگن کیچه کماندو کوچلر طالبان گروهی نینگ تخار مرکزی تالقان شهریدهگی هجومیگه توسیق بولگن.
تخار ولایتی کینگش کاتبی محمد اعظم افضلی نینگ ایتیشیچه، چاهآب، خواجهغار و بهارک تومنلری طالبان قولیگه سقوط قیلگن و یوزلرچه عایله آواره بولگن.
باشقه تاماندن، تخار ولایتی نینگ بهارک تومنیده هوایی کوچلر تامانیدن اویوشتیریلگن عملیات نتیجهسیده، مردمی کوچلردن بیرقطاری هلاک ایتیلیب و یرهلنگن دیر. مردمی منبعلرگه کوره، اوشبو واقعهده مردمی کوچلردن 25 تهسی هلاک و یرهلنگن دیر؛ بیراق محلی مقاملر مردمی کوچلردن 6 تهسینینگ هلاک و باشقه 8 تهسینینگ یرهلنگنینی تصدیقلیدی.
گزارشلر اساسیگه کوره، طالبان گروهی ایکی کیچه آلدین بهارک تومنیده مردمی کوچلر قومندانی داوود بهارکی نی ایکی قوروقچیسی بیلن اوققه توتیب و اونینگ اوینی اوتگه تارتگن.
بهارک تومنیده یاشلر مسوولی عرب زاده نینگ ایتیشیچه، حاضرده اوشبو تومن مرکزی طالبان نظارتیگه دیر.
بیراق، تخار پولیس قومندانلیگی سوزلاوچیسی خلیل اسیرنینگ ایتیشیچه، طالبان گروهی نینگ خواجهغار، چاهآب و بهارک تومنیدهگی هجوملری آرتده اوریلگن.
تخار ولایتی کسلخانه سرپرستی منیر عزیزی نینگ ایتیشیچه، سیلاو کونیدن حاضرگچه ایکی عیال و بیر باله شامل 32 جسد و 37 یرهدار کیشی بو کسلخانهگه انتقال بیریلگن.
تخار ولایتیده اوروشلرنینگ شدتلنگنی سبب، مخابراتی ترماقلر فعالیتی توختهتیلگن و طالبان گروهی تاجیکستان دن کیلهدیگن ایکی برق پایهسینی قندوز ولایتیده تخریب قیلگن.
