د طالبانو مشر ملا محمد عمر د را روان کوچني اختر په مناسبت خپلو جنګيالیو ته په ليکلي پېغام کې ويلي، چې له دښمن سره د سولې خبرې اترې د اسلامي اصولو خلاف نه ده.
ده په خپل پېغام کې دا هم ويلي، چې په قطر هېواد کې د طالبانو سياسي دفتر، سياسي فعاليتونه او معضلاتو ته د حل لارې موندل یو روا عمل او د طالبانو حق دی.
نوموړي ویلي دي، چې د اسلام مبارک دین د لارښوونو پر بنسټ له دښمن سره سوله ییز تعامل کولو په موخه لېده کاته او خبرې اترې مانع نه لري.
ملا عمر په دغه پیغام کې، چې د طالبانو په ویب پاڼه کې خپور شوی دی، خپلو ټولو جنګیالیو څخه غوښتي، چې په خپلو جګړو او ځانمرګو بریدونو کې د ولسي وګړو ژوند ته پام وکړي.
د طالبانو امیر زياته کړې، چې نور دولتي چارواکي مه وژنئ ، بلکې د هغوی د اصلاح له پاره کار وکړئ او سمې لارې ته يې هدایت کړئ.
هغه په دغه پيغام کې خپلو ټولو جنګیالیو ته خبرداری ورکړی، که د ولسي وکړو ژوند ته پام ونه کړي دوی به يې له خپلو لیکو وباسي.
ملا عمر د کوچني اختر په مناسبت د مبارکۍ پېغام ترڅنګ ټينګار کړی، چې ټول طالب جنګیالي دې د بهرنیانو تر وتلو پورې خپلې جګړې ته دوام ورکړي.
ملا عمر په دغه پیغام کې، چې د طالبانو په ویب پاڼه کې خپور شوی دی، خپلو ټولو جنګیالیو نه غوښتي دي، چې په خپلو جګړو او ځانمرګو بریدونو کې د ولسي وګړو ژوند ته پام وکړي.
دا لومړی ځل دی، چې د طالبانو رهبر د سولې خبرو اترو ته شین څراغ ښودلی دی او د ولسي وګړو د ژوند د خوندیتوب خبره کوي.
که څه هم ملا عمر د پیغام په لومړیو کې د افغان امنیتي ځواکونو او له بهرنیانو سره پر جګړه کولو ټینګار کړی، خو د سولې په اړه یې له نرم دریځ نه کار اخیستی دی.
د سولې په اړه د ملاعمر نرم دریځ د دې ښکارندويي کوي، چې د سولې پروسې ته د رالیږل شویو استازو سره یې ليده کاته شوې دي.
د طالبانو د استازو او افغان حکومت استازو تېره اوونۍ د پاکستان په منځګړيتوب په مري کې سره خبرې وکړې.
که څه هم ځينو شنونکو داسې ويلي وو، چې په مري کې د سولې خبرو اترو له پاره حاضر شوي کسان هيڅکله د طالبانو استازولي نه شي کولی، خو د ملا عمر په پېغام کې دغه اثر له ورایه ښکاري.
د افغان حکومت چارواکو د سولې په اړه د طالبانو له وروستیو خبرو نه هرکلی کړی او دا یې د افغانستان او سیمې په ټیکاو کې نیک ګام او کار بللی دی.
په دې خپور شوي پیغام کې ملا عمر د قومونو په یووالي ټینګار کړی دی او ویلي دي، چې دوی د قومونو مشروع حقونو ته احترام کوي.
د طالبانو رهبر په دې پیغام کې ویلي، چې که دوی د هېواد واګې په لاس کې واخلي، نو د ټولو افغانانو روا حقونه به ورته وکړي.
ملا عمر له ګاونډیو هېوادونو سره په ځانګړې ډول د پاکستان او ایران له څارګرو ادارو سره د دې ډلې اړیکې لرل رد کړي دي.
د طالبانو رهبر په دې پیغام کې ویلي دي، چې له عصري علومو سره د طالبانو مخالفت پر دوی تور ګڼلی او زیاته کړې يې ده، چې د دوی د فقهي احکامو په رڼا کې د عصري علومو په ګټه ټینګار کوي.
د سولې خبرو اترو دویم دور ۱۵ ورځې وروسته پېل کیږي
له بل لوري دهېواد مشر اشرف غني وايي، چې د سولې خبرو اترو دویم پړاو به ۱۵ ورځې وروسته پیل شي او د یو مشخص چوکاټ پر بنسټ به پر مخ یوړل شي.
ولسمشر غني نن د (جولای په ۱۵مه) د خوست ولایت د ځانمرګي برید د قربانیانو ليدنې په مراسمو کې وویل، چې له طالبانو سره د سولې خبرو په دویم پړاو کې به د تلپاتې سولې لپاره په یو میکانیزم خبرې وشي.
د روانې اوونۍ د یک شنبې په ورځ په خوست ولایت کې د بهرنیانو نظامې هډې ته څېرمه په یوې چاودنې کې ۲۷ ولسي وګړي او ۶ سرتېري و وژل شول.
ولسمشر غني له طالبانو سره لومړۍ خبرې بریالۍ و بللې.
نوموړي وویل، چې پاکستان هېواد ۱۴کاله له افغانستان سره نا اعلان شوې جګړه مخ ته یوړه او اوس " موږ دغه جنګ ته د پای ټکی ږدو."
ولسمشر د خوست له خلکو نه وغوښتل، چې د سولې او ټیکاو له پاره دې له حکومت سره مرسته وکړي.
