د افغانستان د برېښنا شرکت وايي، چې د بغلان په ډنډ شهاب الدین سیمه کې له تاجکستان څخه وارداتي برېښنا د تخریب شوي پايې شاوخوا د افغان امنيتي ځواکونو په واسطه تصفیه شوي او د دغې پايې د بیا رغونې پر موخه کار روان دی.
همدارنګه د برېښنا شرکت مطبوعاتي مسوول وايي، چې پلازمېنه کابل ته به په نوبتي ډول په هرو ۲۴ ساعتونو کې له ۴ تر ۵ ساعتونو برېښنا ورکړل شي.
دغه شرکت وروسته له هغې د برېښنا جریان په ناببره ډول را کم کړ، چې د وسله والو طالبانو له لوري د بغلان ولایت په ډنډشهاب الدین سیمه کې له ازبکستان څخه کابل ته د غځېدلې برېښنا مټه په بمونو والوزوله.
د راپورونو له مخې د تېرې سې شنبې (۲۶مه د نومبر) په شپه د افغان امنیتي ځواکونو او وسله والو طالبانو تر منځ په نښته کې وسله والو طالبانو دغه مټه الوزولې ده.
په الوزول شوې مټې باندې د برېښنا ۲۸۰ میګاواته مزی تېر شوی و.
د برېښنا شرکت د نشراتو رییس وحید توحیدي سلام وطندار سره په مرکه کې وویل، تر هغه چې د ډنډشهاب الدین په سیمه کې د برېښنا مزی د انجینیرانو له لوري تړي کېږي؛ د کابل ښار هرې سیمې ته په نوبتي شکل په ۲۴ ساعتونو کې یوازې ۴ یا ۵ ساعتونه برېښنا ورکولای شي.
توحیدي زیاتوي، چې د پرې شوې ۲۸۰ میګاواټه برېښنا مزي په بدیل کې به ۱۵۵ میګاواټه برېښنا، چې۸۰ میګاواټه د تاجکستان او ۷۵ میګاواټه یې د کابل ترخېلو حرارتي بریښنا ده؛ ښاریانو ته وویشي.
له دې مخکې د بغلان ولایت چارواکیو ویلي وو، په دغه سیمه کې چې د برېښنا مټه الوزول شوې، د طالبانو تر کنټرول لاندې ده.
د بغلان والي رسنیو ته ویلي و، چې د امنیتي ستونزو له امله نه شي کولی ژر تر ژره دغه مزی وتړي.
خو نوموړي نن ګهیځ تاید کړ، چې سیمې ته امنیتي ځواکونه ورغلي دي او ساحه یې د ماینونو له ګواښ څخه پاکه کړې ده.
له بل لوري وسله والو طالبانو ویاند ویلي دي، د دوی ملګرو دغه مټه نه ده الوزولې او دغه کار افغان امنیتي ځواکونو کړی دی.
د برېښنا شرکت مطبوعاتي مسوول وايي، چې سیمه اوسمهال د افغان پوځيانو په ولکه کې ده او زیاتوي، چې د بغلان سیمه ییز چارواکو ډاډ ورکړی، چې نن تر یوې بجې پورې به سیمه له ماینونو پاکه کړي.
توحیدي ټینګار وکړ، چې له سیمې د ماینونو پاکېدو سره سم به دوی د برېښنا پرې شوی مزی له ۶ــ ۸ ساعتونو وتړي.
