د پلازمينې کابل ابتدايه محکمې امر وکړ، چې د فرخندې د قتل په باب باید د کابل امنيه قومندان په ګډون د کورنيو چارو وزارت د جنايي جرمنو مشر او یو شمېر نور امنيتي مسوولین د سپيناوي له پاره حاضر شي.
په ابتدایه محکمه کې د فرخندې د قتل د دوسیې ارزونې په تړاو لومړنۍ ناسته کې ۴۹ تورن کسان هم محکمې ته راوستل شوي وو.
دغه محکمه نن د ( ۲۰۱۵ م زېږدیز/مای په ۲) په ډاګیزه توګه د کابل په ابتدایه محکمه کې جوړه شوې وه.
د محکمې قاضي په نننۍ ناسته کې اړوندو ارګانونو ته امر وکړ، چې د کابل امنیه قومندان عبدالرحمان رحیمي، د کورنیو چارو وزارت د جنايي تحقیقاتو رییس جنرال ظاهر ظاهر، د کابل د امنیه قومندانۍ د امنیتي چارو مرستیال او د مخابراتو مدیر، د دویمې امنیتي حوزې د مخابراتو مسول او د کابل دوه نور امنیتي چارواکي، چې د فرخندې د قتل پر ورځ په ناغېړۍ تورن شوي؛ د محکمې په دویمه ناسته کې حاضر کړي او د محکمې پوښتنو ته ځواب ووايي.
محکمې همدارنګه د فرخندې په قتل کې د کابل د دویمې امنیتي حوزې د کشف امر تورن وګاڼه او څارنوالۍ ته یې امر وکړ، چې ويې نیسي.
په ياده ناسته کې د محکمې قاضي له خوا د فرخندې وهونکي، د هغې وژونکي او مړي ته یې اور اچوونکي اصلي عاملین وګڼل شول.
د شاه دوشمشېره جومات خدمتګار د دغو تورنو کسانو په لومړۍ درجه خطرناکه دوسیه لري.
د کابل د ابتدایه محکمې قاضي وویل، چې د شاه دو شمشېره جومات خادم هم په تورنو کسانو کې و او هغه يې د فرخندې په قتل کې د خلکو هڅوونکی و باله.
په ۴۹ تورنو کسانو کې د پولیسو یو قومندان هم و هغه يې په خپله دنده کې د ناغېړې په تور محکمې ته حاضر کړی و.
محکمې همدارنګه د فرخندې په قتل کې د کابل د دویمې امنیتي حوزې د کشف امر تورن وګاڼه او څارنوالۍ ته یې امر وکړ، چې ويې نیسي.
۲۸ کلنه فرخنده له نوي ۱۳۹۴کال نه دوې ورځې وړاندې د کابل په شاه دوشمشېره کې د قرآنکریم د سوځولو په تور، د قهرېدلو کسانو له خوا ووژل او وسوځول شوه.
د محکمې په نننۍ ډاګیزه غونډه کې ۱۹ پولیس هم شامل و.
د محکمې قاضي په نننۍ علني محکمه د فرخندې د قتل په اړه د حقیقت موندنې کمېسیون له غړیو وغوښتل، چې په سبانۍ محکمه کې حاضر شي.
د فرخندې د قتل په تور د نیول شویو کسانو په پار نننۍ جوړه شوې ډاګیزه محکمه کې، چې په ژوندۍ بڼه له رسنیو خپرېده؛ د ولسي جرګې دوو تنو ښځینه غړیو شینکۍ کړوخېل او فوزيه کوفي او یو شمېر مدني فعالانو ګډون درلود.
د فرخندې قتل په کور دننه او بهر زیات شمېر اعتراضونه او جنجالونه راوپارول.
اعتراض کوونکیو له دولته غوښتل، چې هر څومره ژر کېږي، د فرخندې قاتلین ونیسي او محاکمه یې کړي.
د فرخندې د قتل په څلوېښتمه ورځ یو شمېر کابل مېشتو مدني فعالانو او کابل مېشتو وګړیو له دولته د فرخندې د قاتلینو د محاکمه کولو غوښتنه وکړه.
دغو اعتراض کوونکیو شاه دوشمشېره جومات ته مخامخ د فرخندې د وژل کېدلو صحنه نمایش ته وړاندې کړه.
د فرخندې د قتل په تور د نیول شویو کسانو د محکمې دویمه ناسته به، سبا د (مای په ۳مه) سهار نهه بجې برابره شي.
یاده دې وي، چې له دې وړاندې ولسمشر محمد اشرف غني د فرخندې له کورنۍ سره د کتلو پرمهال هغوی ته ډاډ ورکړی و، چې د فرخندې قضیه به پخپله له نژدې وڅاري او د عاملينو سره به يې قانوني چلند وکړي.
