.jpg)
د بادغیس د ولایتي شورا رییس عبدالعزیز بیګ سلام وطندار ته وویل چې طالبانو سهار شاوخوا یوه بجه د دې ولایت د بالامرغاب ولسوالۍ په په «لودینها» سیمه کې د ملیاردو د تعقیبي ټولي پر پوستو بریدونه کړيدي.
د ښاغلي بېګ په وینا، دې نښتې ۵ ساعته دوام کړی، طالبانو پهدې برید کې ټولی نیولی، د ملياردو ۱۵ سرتېري یې وژلي او ۲۰ یې اسیران کړيدي.
د ولایتي شورا دا غړی وایي چې دې امنیتي ځواکونو په روانه یوه اوونۍ کې له لویدیځ حوزې نه څو ځلې مرسته غوښتې وه؛ خو چا یې غږ نه و اورېدلی.
د بادغیس د ولایتي شورا رییس د بالامرغاب د امنیت تامین په برخه کې په بېپامۍ تورنوي او وایي چې طالبان له یوې اوونۍ راهیسې دې ولسوالۍ ته ورټول شوي او هره شپه د ملياردو پر پوستو بریدونه کوي.
د بادغیس د والي ویاند جمشید شهابي د ملياردو پر پوستو د طالبانو بریدونه تاییدوي؛ خو وايي چې پهدې برید کې د ملياردو ۴ سرتېري وژل شوي او ۴ نور ټپيان شويدي.
ښاغلی شهابي د ۲۰ سرتېرو اسېرېدل ردوی او وايي چې پهدې برید کې ۱۰ طالبان هم وژل شوېدي.
د والي ویاند د بالامرغاب ولسوالۍ امنیتي وضعیت اندېښمنوونکی بولي او وايي چې د هوا د نامناسبوالي له امله د مرستو په رسولو کې خنډ راغلی دی.
دوې ورځې مخکې هم له ۲۰۰ تر ۳۰۰ طالبانو له پرمختللیو وسلو سره د بالامرغاب ولسوالۍ په اکازي کلي کې د ملياردو پر پوستو بریدونه کړي وو او د څوو سرتېرو تر څنګ یې دوې امنیتي پوستې نیولې وې.
طالبانو هم پېښه او د امنیتي ځواکونو تلفات تایید کړيدي.
وايي چې له څلورو کالو راهیسې بالامرغاب ته د تګ ـ راتګ ځمکنۍ لارې بندې دي.
ورته مطالب:
په بادغیس کې طالبانو د اردو ۳۰ سرتېري وژلي
