مشعل: روان کال به د افغانستان د کرېکټ تعمیراتي کال وي

د افغانستان د کرېکټ بورډ مشر عاطف مشعل نن ورځ له اجرایوي مشر شفیق الله ستانکزي سره په ګډه خبري غونډه کې د روان کال د پلانونو او دغه راز د بورډ، د غړو سره د شوي کلنۍ ناستي (AGM) په اړه معلومات ورکړل.

عاطف مشعل په خپلو خبرو کې وویل چې د خپلې دورې لومړي کال کې یې پالیسي جوړه کړه او روان کال به د کرېکټ تعمیراتي کال وي.

د نوموړي په وینا، د بورډ په کلنۍ غونډه کې د حکومت له‌خوا ۴ میلیونه ډالر په افغانستان کې د لوبغالو د جوړولو له‌پاره تصویب شول چې ترڅنګ به یې روزنیزې اکاډمۍ هم جوړې شي.

ښاغلي مشعل زیاته کړه، د کابل کرېکټ لوبغالي د پراخېدو ترڅنګ به سږکال په کابل کې د یوه بل نړیوال لوبغالي له‌پاره د ځمکې پيداکېدو په شمول په بهسودو، لغمان او د پکتیا په کرېکټ لوبغالو هم کار پیل کړي.

نوموړي وویل د سږکال له‌پاره ۵ میلیونه ډالر د کرېکټ نړیوالې شورا ، ۱ اشاریه ۳ میلیونه ډالر د الکوزي شرکت له‌خوا او ۵ اشاریه ۸ میلیونه ډالر د حکومت له‌خوا ترلاسه کوي چې د دغې بودیجې د لګولو له‌پاره یې پلان برابره کړی دی.

دغه راز د تېرو کلونو راپه دې خوا ۲ اشاریه ۱ میلیون ډالر له الکوزي شرکت سره پاتي دي چې په بېلابېلو برخو کې به ترې کار واخلي.

نوموړي دغه راز وویل چې وړاندې د افغانستان نړیوالې سیالۍ ۹۵سلنه د افغانستان مینه‌والو له‌پاره په تلویزون خپرې شوي او له دې وروسته هڅه کوي د تلویزوني حقوقو پلورلو، ډېرو پیسو او مینه‌والو جلبولو له‌پاره په ډېرو هېوادونو کې د افغانستان د کرېکټ سیالۍ وښودل شي.

د عاطف مشعل په وینا، د بورډ غړو د دوی له‌خوا ۴ بېلابېلو د غوراوي کمېټې چې له‌مخې به یې لوبغاړي په شفافیت سره غوره کېږي؛ مالیاتي پالیسي چې د راتلونکیو او تلونکیو پیسو شفافه پروسه به ولري؛ بشري منابع چې له‌مخې به یې کارکوونکي خپل حقوق وپېژني او هم به دایمي تړون ولري او د خریدارۍ پالیسۍ چې د یوې شفافې پروسې له لارې به تړونونو کېږي هم تصویب کړل چې د کرېکټ بورډ ادارې د اصلاحاتو له‌پاره یو ښه قدم دی.

د کرېکټ بورډ مشر زیاته کړه د بورډ غړیو له منظورۍ وروسته به اوس د کرېکټ بورډ د داخلي تفتیش له‌پاره یوه کمېټه جوړیږي او هم به د اعتراض کوونکیو کارکوونکیو غږ اورېدل کېږي.

ښاغلي مشعل له هندي کمپنۍ «سنکسرز سپورټس» سره د شوي تړون دفاع وکړه چې په وینا یې د «افغانستان شل اوریزه پریمیرلیګ» سیالیو کې د افغانستان ګټه ده او هرکال به افغان کرېکټ بورډ ته ۶ لکه ډالر ګټه راځي.

نوموړي دغه راز زیاته کړه چې د افغانستان په لومړي پړاو (A20PL) کې به د کابل، ننګرهار، بلخ، لویې پکتیا، هرات او کندهار په نوم لوبډلې ولوبېږي.

عاطف مشعل وویل چې د ملي لوبډلې د روزونې له‌پاره غټ نوم نه بلکې ښه نوم په کار دی او دوی د ویسټ انډيزي پیل سیمینز تر مشرۍ له‌پاره نوې ۳ کسیز موقتي روزونکي ډلې له ګومارنې پوره خوښ او ډاډه دي چې ښې پایلي به ولري.