مدنی فعال‌لردن بیرقطاری‌نینگ ایتیشیچه، جامعه فکری پولیس عیال‌لر توغری‌سیده اوزگریشی لازم. اوشبو فعال‌لر بوگون (چهارشنبه) پولیس عیال‌لر، تینچ‌لیک و امنیت‌دن حمایت ایتیش عنوانی آستی‌ده اوتکزیلگن ییغینده ایتیش‌لریچه، پولیس عیال‌لر توغری‌سیده خلق آگاه سیزلیگی باعث، افغانستان‌ده‌گی پولیس عیال‌لرنینگ قیین چیلیککه دوچ کیلتیرگن.
بو اولتیریش‌ده مدنی فعال‌لردن بیری زهرا سپهرنینگ ایتیشیچه، عیال‌لر تینچ‌لیک تامین‌لنیشی خصوصیده ایجابی رول اوینه‌یدی، شونینگ‌دیک، پولیس عیال کم‌لیگی اولرنی خواطرگه سالگن.
اونینگ ایتیشیچه، میدیا، دین علمالری و عیال‌لر حقی‌دن دفاع قیلووچی اداره‌لر پولیس صفی‌گه عیال‌لر حضور اهمیتی توغری‌سیده جامعه فکری‌نی اوزگرتیریش خصوصیده، سعی و حرکت قیلیش‌لری لازم.
مدنی فعال‌لرنینگ ایتیشیچه، افغانستان‌ده پولیس عیال‌لر حضوری آز کورینه‌دی و ایچکی ایشلر وزیرلیگی تامانیدن پولیس عیال‌لر کوپه‌یتیریلیشی کیره‌ک.
گزارش‌لرگه کوره، حاضر افغانستان‌ده پولیس عیال‌لر رقمی 2834 گه ییتیشه‌دی، بو رقم ایسه افغانستان پولیسی‌نینگ ایکی فایزی‌نی تشکیل بیره‌دی. ایچکی ایشلر وزیرلیگی رسمی‌لری‌نینگ ایتیشیچه، حاضر 80 عیال مذکور وزیرلیک کلیدی بولیم‌لریده ایشلب کیلماقده.
ایتیلیشیچه، میلادی 2016- ییل‌ده پولیس عیال‌لر رقمی 5 مینگ‌گه ییتیشه‌دی و 2024- ییل‌ده 10 مینگ‌گه کوپیتیریلیشی کوزلنگن.
ایچکی ایشلر وزیرلیگی جندر عمومی مدیری عیدی‌احمد حکیمی‌نینگ ایتیشیچه، بو وزیرلیک پولیس عیال‌لر کوپه‌ییشی توغری‌سیده سعی و حرکت قیلماقده.
اونینگ ایتیشیچه، ایچکی ایشلر وزیرلیگی، میلادی 2024- ییل‌گچه پولیس عیال‌لر رقمی‌نی 10 مینگ‌گه ییتیشتیره‌دی.
بیراق جناب حکیمی‌نینگ ایتیشیچه، بو هدف اوچون ایچکی ایشلر وزیرلیگی‌نینگ بودجه‌سی کم دیر و بو خصوصده یاردم بیروچی مملکت‌لر تامانیدن یاردم بیریلیشی لازم.
عین حالده مدنی فعال‌لر، ایچکی ایشلر وزیرلیگی کلیدی بولیم‌لریده عیال‌لر حضوری، میلادی 2016- ییل‌گچه پولیس عیال‌لر رقمی 5 مینگ‌گه آشیریلشی، عیال‌لر اوچون تعلیمات زمینه‌سی یره‌تیلیشی، امتیازلری کوپه‌ییشی و پولیس عیال‌لرگه قولی‌لیک‌لر یره‌تیلیشی خصوصیده ایچکی ایشلر وزیرلیگی‌گه ایریم ریجه‌لر تکلیف قیلگن‌لر.
