مخابراتی شرکتلردن 10% سالیق توپلش جریانی 1394- ییل میزان آی نینگ 1- تاریخیده باشلندی.
بو جریان اجرای مسوولیتینی مالیه، تکنالوژی و مخابرات وزیرلیگی و مخابراتی خذمتلرنی تنظیم قیلیش یا-ده اترا ادارهسی بوینیگه آلگن.
بو جریان باشلنگنیدن 4 ییل اوتماقده، بیراق مخابراتی شرکتلردن آلینهدیگن سالیقنی قیسی اداره حسابیگه توپلنگنی بیللی ایمس.
بوگون "چهارشنبه" مالیه وزیرلیگینی اورین باسری زاهد همدرد نینگ ملتگه جواب قیتریش برنامهده ایتیشیچه، مخابراتی شرکتلردن آلینهدیگن 10% سالیق نینگ قیسی آدرسده توپلهنیشی بیللی ایمس و بو موضوعنی بیللی ایتیلیشی کیرهک.
جناب همدردگه کوره، 10% سالیق نینگ تنظیم قیلیش و جواب قیتریشی اترا ادارهسی نینگ مسوولیتی و اوشبو ادارهنینگ بو توغریده اهالیگه معلومات بیریشی کیرهک.
بیراق، اترا ادارهسی مسووللرینینگ ایتیشیچه، مخابراتی شرکتلردن آلینهدیگن 10% سالیق مخابرات و تکنالوژی وزیرلیگینینگ حسابیده کیرهدی.
اترا ادارهسینی باشلیغی نجیبالله عزیزی نینگ ایتیشیچه، سالیقنی توپلش تیزیمی مخابرات و تکنالوژی وزیرلیگی بیلن امضا ایتیلگن و مخابراتی سالیقنی توپلش بوتون ارقاملر بو وزارت تامانیدن ارائه قیلینگن و اترا ادارهسی تامانیدن هم قبوللنگن.
عینحالده، مخابرات وزیرلیگی مسوللرینینگ نیچه پیت آلدین قیلگن صحبتلریگه کوره، مخابراتی سالیق دولت خزانهسیگه کیرهدی.
بو توغریده مخابرات و تکنالوژی وزیرلیگی مسووللرینینگ فکرینی آلیش اوچون سعی و حرکت قیلدیک، بیراق موفق بولمهدیک.
ایتیش کیرککه، جمهور رئیس غنی 4 ییل آلدین بیر فرمان آرقهلی، مخابراتی خذمتلر اوستیگه سالیق قویدی و اوندن سونگ بوتون مخابراتی هزینهلردن 10% سالیق آلینهدی و مخابراتی شرکتلرنی بو سالیقنی حکومت حسابیگه کوپهیتیریشی کیرهک.
جمهورلیک ریاستی نیچه پیت آلدین، اوشبو فرمان نینگ صادر ایتیلگنیدن 1397- ییل گهقدر 14 میلیارد و 590 میلیون افغانی مخابراتی خذمتلردن توپلنگنینی ایتگن ایدی.
