د ۵ ساعتونو د جګړې له کمېدو وروسته یو ځل بیا د لوګر ازرې ولسوالۍ کې د افغان امنیتي ځواکونو او طالبانو ترمنځ نښته پيل شوې ده.
د ازرې په ولسوالۍ کې نن د (جون په ۱۵مه) سهار مهال جګړه پیل شوه.
د میدان وردګو او لوګر د څلورمي پلې لوا قومندان عبدالرازق ساپي سلام وطندار ته وویل، چې په تازه نښته کې ۴۵ تنه طالبان، ۲ پولیس سرتېري او ۳ مېرمنې وژل شوي دي.
د همدې نښتې په پرلپسې بهیر کې تېره ورځ ۵ ولسي وګړي، ۱۷ طالبان او ۲ پولیس وژل شوي و او په سلګونه کورنۍ د کورونو پرېښودو ته اړ شوي وې.
طالبانو د دې بریدونه مسولیت منلی او ویلي دي، چې د دې ولسوالۍ څو امنیتي پوستې یې هم په ولکه کې دي.
ازره د لوګر هغه ولسوالۍ ده، چې د افغانستان له ۳ ولایتونو او له قبایلي سیمو سره ګډه پوله لري، د دغې ولسوالۍ ستراتیژیک موقیعت د دې لامل شوی، چې د طالبانو د پام وړ وګرځي.
دغه ولسوالۍ له کابل، پکتیا، ننګرهار او له سرحدي قبایلي سیمو سره ګډه پوله لري.
