د غور ولایت ځېنې اوسېدونکي او د ولایتي شورا غړي وايي، یو کال شو چې د پوزلېچ برېښنا بند جوړولو چارې د بېلابېلو لاملونو له امله درول شوي او سره له دې چې هغوی د دغه بند له پڅو او درول شویو کارونو شکایت کړی دی خو حکومت د هغوی دغو غوښتنو ته پام نه دی کړی.
خو دا ځل هغوی خبرداری ورکوي که چېرې د دغه بند کار له سره پیل نهشي بیاځلي به اعتراض وکړي او د تحصن خېمې به ووهي.
د غور دوه اوسېدونکي علاوالدین جلالي او خدایار واقف سلاموطندار ته وویل، له حکومته په جدیت سره غواړو چې د دې ولایت له خلکو سره د تېرکال شوې هوکړه عملي شي او ژرترژره د بند جوړولو چارې پیل شي.
دوی وايي، ولسمشر غني او په ځانګړې توګه د اوبو او برېښنا وزارت باید د غور خلکو مشروع غوښتنې ومني.
د غور ولایتي شورا مرستیال عبدالرحمان عطشان د پوزلېچ برېښنا بند جوړولو چارو کې د ځنډ لامل د درېیو قراردادي شرکتونو حقوقي ستونزې او د اوبو او برېښنا له پخواني وزیر سره د ولسمشر اختلافونه بولي. هغه وايي، که چېرې مرکزي حکومت دغه ستونزه حل نهکړي دوی به هم له خلکو سره همغږه شي.
عطشان وايي، د پوزلېچ برېښنا بند قراردادي امینالله هوتک ولایتي شورا ته ویلي چې د ولسمشر غني او د اوبو او برېښنا وزیر ترمنځ د اختلاف له امله د پروژې کار ځنډول شوی دی.
د پوزلېچ برېښنا بند د ۱۵ میلیونو امریکايي ډالرو په ارزښت د فېروزکوه ښار په ختیځ کې د هریرود سیند په غاړه جوړیږي چې د ۴،۵ میګاواټه برېښنا تولیدولو ظرفیت لري.
د غور د والي ویاند عبدالحی خطیبي وايي، د حقوقي جنجالونو ترڅنګ د دغه برېښنا بند جوړولو لهپاره هېڅ ډول بودیجه په پام کې نهده نیول شوې.
تېرکال د غور اوسېدونکیو پراخ اعتراض لامل شو ترڅو د ارګ پلاوی دغه ولایت ته سفر وکړي.
دغه پلاوي په غور ولایت کې اعتراض کوونکیو سره یو هوکړهلیک لاسلیک کړ چې په کې د پوزلېچ برېښنا بند په جوړولو د ۱۰۰ کیلومتره سړک رغولو او د ۵ میګاواټه لمریزې برېښنا په رامنځ ته کولو هوکړه وشوه.
