د پکتيا ځايي چارواکي وايي، چې په پټان ولسوالۍ کې د سرحدي ځواکونو له لوري په يو موټر کې بار۷ زره ۶۶۲ کيلو ګرامه امونيم نايترېت نيولي دي.
د سويل ختيځ زون ۴۰۲ نمبر سرحدي لوا مسوولين وايي، دغه موټر د دې ولايت په پټان ولسوالۍ کې د سرحدي پوليسو له لوري هغه مهال ونيول شو، چې د ډيورنډ له کرښې دې خوا را اوښتی و.
د ۴۰۲ نمبر سرحدي لوا قومندان مل پاسوال عبدالبصير خپلواک سلام وطندا ته وويل، چې د امونيم ناېترېت په تور يې د يو پاکستاني په ګډون درې کسان نيولي دي.
خپلواک وايي، نيول شوي امونيم ناېترېت، چې په پاکستانۍ لارۍ کې ځای پر ځای شوي و او په لس کيلو ګرامه سپينو بوجيو ليکل شوي، چې )د پنجاب حکومت له لوري افغانانو ته د روزۍ ځانګړې تحفه(.
په پټان ولسوالۍ کې د سرحدي ځواکونو د کنډک قومندان سمونوال سيف الله سرحدي وايي، امنيتي ځواکونه د دې وړتيا لري، چې د وسلوالو مخالفينو د فعاليتونو مخه ونيسي.
" موږ دې ته نه ګورو، چې کوم يو د مخالفينو او ورانکارو مخه ونيسو" بلکې دده په وينا هر يو هڅه کوي، چې له خپلې خاورې د سر په قيمت دفاع وکړي.
د امونيم نايتريت سرې څخه د بمونو په جوړولو کې کار اخيستل کيږي، چې څلور ورځې وړاندې هم دې ورته په امونيم نايتريت بار موټر د ملي پوليسو له لوري په پټان ولسوالۍ کې نيول شوی و.
د افغانستان د ملي امنيت عمومي رياست په ۱۳۸۹ م لمريز کال د چنګاښ په درېيمه اعلام وکړ، چې د افغانستان پخواني ولسمشر حامد کرزي د فرمان پر بنسټ له دې وروسته په هېواد کې د امونيم ناېترېت په تولید، خرڅ او استعمال بنديز ولګېد.
هغه مهال د ملي امنيت ریاست راپور خپور کړی و، چې د دولت مخالف وسله وال په خپلو ځانمرګو بريدونو او نورو انفجاري عملياتو کې له ۸۰ سلنو ډېر د امونيم ناېترېت موادو څخه کار اخلي او دغه مواد د افغانستان دننه او بهر کې په ډېرې اسانۍ سره پېدا کيږي.
پخوا افغان بزګرانو په زراعتي چارو کې د ښه حاصلاتو لاسته راوړلو په موخه له امونيم نايتريت سرو څخه کار اخیسته، چې بیا د زراعتي کارپوهانو له لوري هم له دې امله د امونيم نایتریت موادو استعمال بند شو، چې ځمکې يې هم ډنګرولې او کال په کال يې حاصلات خرابول.
