د فینکس کېمپ، چې پخوا د ناټو ځواکونو نظامي اډه وه اوسمهال د روږدو کسانو د درملنې پر مرکز بدل شوی دی.
د عامې روغتیا وزارت د نشه يي توکو د غوښتنې د کموالي مشر احمد فواد عثماني وايي، حکومت هڅه کوي، چې په نږدې راتلونکي کې کابل ښار پر نشه يي توکو له روږدو کسانو پاک کړي.
د عثماني په وینا، د فینکس کېمپ د ۱۵ سوو روږدو کسانو د درملنې وړتیا لري او تراوسه هغوی ۶۰۰ معتادین ثبت کړي دي.
له بل لوري د هلمند ولایت څخه یو تن په نشه يي توکو روږدي کس، چې له نوم اخیستو يې ډډه کړې سلام وطندار ته وویل، د دوی له پاره ټول امکانات او اسانتیاوې د عامې روغتیا وزارت له لوري برابر شوي دي.
دی وايي، چې د اوزګارتیا له امله يې د اتو کالو راهیسې نشه يي توکو ته مخه کړې.
یو بل ځوان، چې په ایران کې روږدی شوی د خپل کورنۍ له ناوړه چلند څخه شکایت کوي او وايي، څو ځلې يې پريکړه کړې، چې نشه پريږدي، خو د مور او پلار بې باوري د دې لامل شوی، چې بېرته پر نشو روږدی شي.
په همدې حال کې د فینکس کېمپ طبي مسوول ډاکتر احمد ظاهر سلطاني وایي، چې د روږدو کسانو درملنه په درې پړاونو کې کوي.
د هغه په وینا، لومړی پړاو کې د ناروغانو روحي مسله په پام کې نیسي، دویم پړاو کې د دوی دارو درمل کوي او په درېيم پړاو کې بیا داسې مراحل پرې تطبیقوي، چې بېرته په نشو روږدي نه شي.
د فینکس کېمپ یا د روږدو کسانو درملنې مرکز مسوولین وایي، چې د دغه مرکز له پاره ۳ میلیونه ډالره بودیجه په پام کې نیول شوې او اوسمهال ۲۰۰ روغتیایي کارکونکي په دغه مرکز کې د ناروغانو درلمنه کوي.
