د افغانستان د اقتصاد وزارت مسوولین وايي، چې د ځينو کوښښونو سره ـ سره اوس هم د ۷۱ سلنه پروژو لګښت د بهرنيو موسسو له لارې مصرفيږي.
مسوولین زیاتوي، چې په افغانستان کې په ۲۰۱۵ کال کې د غیر دولتي موسسو له خوا ۴۱۳۵ پروژې پلي شوي دي، چې له دې پروژو ۲۵۹۸ د بهرنیو موسسو له خوا او ۱۵۳۷ یې د کورنیو موسسو له خوا تطبیق شوي.
اقتصاد وزارت دغه خبرې د یوې خبري غونډې په ترڅ کې د غیر دولتي موسسو په اړه خپل چمتو کړی راپور وړاندې کولو په ترڅ کې وکړې.
غونډې ته د اقتصاد وزارت وزیر عبدالستار مراد وویل، چې د ولایاتو په کچه د پروژو د پلي کولو په لګښت کې توازن په پام کې نه دی نیول شوی.
دوی د بیلګې په توګه د کابل، تخار، بدخشان، بامیان او ننګرهار ولایتونو نومه واخیستل چې ډيرې پروژې په کې عملي شوي خو په پکتیکا، نیمروز، فراه او میدان وردګو ولایتونو کې د پروژو شمیر بیا کم دی.
مراد زیاتوي چې غیر دولتي موسسو د عامې روغتیا، پوهنې، کرنې او ټولنیزو خدمتونو برخو کې پروژې پلې کړي دي خو زیات هغه د ټولنیزو خدمتونو په برخه کې پلي شوي دي.
په ورته وخت کې غونډې ته د اکبر موسسې مشرې فیوناګل وویل، چې دوی تل هغو خلکو ته کار کوي چې زیانمن شوي وي.
فیوناګل زیاتوي، چې د ډيرو سکتورونو سره د همکارۍ سره سره ځینې داسې ستونزې هم شته چې ددوی د کار پر وړاندې خنډ ګرځي.
د اکبر موسسې مشرې د اقتصاد وزارت څخه غوښتنه وکړله، چې د ستونزو له منځه وړولو په برخه کې دې ورسره مرسته وکړي.
میرمن فیوناګل وایي، چې ځینې دولتي بنسټونه له دوی د پروژو په پلي کولو کې بې ځایه غوښتنې کوي او په دولتي ادارو کې د جواز په اخیستلو کې ستونزې د دوی د کار د مخ ته تګ مخ نیوی کوي.
میرمن فیوناګل وویل، چې دوی اوس د افغانستان په ۴ زونونو کې کار کوي او تل به د بېوزلو خلکو د ژوند د پرمختګ له پاره هلې ځلې کوي.
د اقتصاد وزارت وایي، چې د ۲۰۱۶ کال د غیر دولتي موسسو د کارونو راپور به د ۲۰۱۷ کال د مارچ په میاشت کې خپور کړي.
