.jpg)
د عامې روغتیا وزیر فېروزالدین فېروز وايي، تر دې مخکې هرات ته د راتلونکیو خوراکي توکیو کیفیت معلومول او ارزول په کابل کې کېدل، خو اوس به په دغه ولایت کې د کیفیت معلومولو د کتنځای په جوړېدو سره هرات ته د بېکیفیته خوراکي توکیو د را واردولو مخه ونیول شي.
د فېروز په وینا، د یاد کتنّځای په جوړولو سره به دغه ولایت ته راودېدونکي توکي د کیفیت معلومولو لپاره د هرات په بندر کې نه ځنډېږي.
په همدې حال کې د هرات د خوراکي توکیو د ټولنې رییس محمدکبیر اکبرزاده وايي، د خوراکي توکیو د کیفیت معلومولو د دغه کتنّځای جوړول سوداګرو ته ډېرې اسانتیاوې برابروي.
.jpg)
د هرات یو شمېر سیمهييز مسوولان هم د یاد کتنځای د جوړېدو او له کبله یې سوداګرو ته د اسانتیاوو برابرېدو په اړه خوښي څرګندوي.
د خوراکي توکیو د کیفیت معلومولو پر دغه کتنځای ۲۵۰ زره ډالر لګښت راغلی چې دغه پیسې په هرات کې د خصوصي برخې له لوري ورکړل شوې دي.
د عامې روغتیا وزیر به هرات ته د خپل سفر پر مهال د یاد ولایت په یو شمېر ولسوالیو کې ۱۷ روغتونونه او د روغتیايي مرکزونه ګټې اخېستنې ته وسپاري. نوموړی دغه راز د هرات ولایت په لرې پرتو سیمو کې د ۲۰ نورو روغتیايي مرکزونو د جوړولو خبر هم ورکوي.
