قندهار ولایتیده جاری ییل‌ده تورلی واقعه‌لر سبب، 976 تینچ اهالی هلاک و باشقه 769 تینچ اهالی یره‌لنگن. اوشبو کیشی‌لرنینگ هلاک ایتیلیب و یره‌لنگن دلیلی یول چیککه‌سیده ییرلشتیریلگن ماین، هاوان اوقلری، ترورچیلیک واقعه‌لر، خودکش هجوملر و دولت عسکرلری تامانیدن آتیلگن اوقلر دییله‌دی.
قندهار ولایتیده انسان حقلری ایرکین کمیسیون مسؤوللریدن بیری نعمت‌الله حسنی‌نینگ ایتیشیچه، قربانلردن کوپینچه‌سی (417 هلاک و 407 یره‌لنگن) کیشی‌لر یوللرده ییرلشتیریلگن ماین‌لرگه دوچ کیلگن‌لر. حسنی گه کوره، هلاک ایتیلگن‌لر 623 ایرکک، 163 عیال و 185 باله دیر و شونینگ‌دیک، یره‌لنگن‌لر 402 ایرکک، 174 عیال و 193 باله دییلگن.
قندهار ولایتیده انسان حقلری کمیسیونی اوشبو مسؤولی‌نینگ کوپه‌یتیریشیچه، یوللرده ییرلشتیریلگن ماین‌لردن کیین، ترورچیلیک واقعه‌لر کوپلب قربانلیک آلگن و خودکش هجوم واقعه‌لری، دولت کوچلری تامانیدن آتیلگن اوقلر سونگی درجه‌لرده قرار تاپگن.
قندهار یشاوچیلری، اوروش تامانلریدن اوروش جریانیده تینچ اهالی‌لرنینگ جانلرینی سقلش اوچون کوپراق دقت قیلیش‌لرینی سوره‌یدی. اولرگه کوره، تینچ اهالی‌دن قربانلیک آلیش هیچ بیر دین و مذهب ده جایز ایمس دیر.
قندهار امنیه قومندانلیگی سوزلاوچیسی ضیاء درانی، تینچ اهالی‌لرگه دولت کوچلری تامانیدن اوق آتیلیشی‌نی رد قیلیب ایتیشیچه، تینچ اهالی‌نینگ اولیمی‌نی مسؤولی طالبلر دیر. بیراق طالبان گروهی سوزلاوچی‌لریدن بیری قاری یوسف احمدی‌نینگ ایتیشیچه، طالبلر یالغیز حکومت و چیت ایللیک کوچلر بیلن اوروشه‌دی و بو گروه تینچ اهالی‌نی اولدیرمه‌یدی.
