د ایران څخه را رسېدلي راپورونه وايي، چې داسې هڅې روانې دي، چې د مولانا جلاالدین محمد بلخي مثنوي، معنوي کتاب د ایران او ترکیې هېوادونو له خوا د یو فرهنګي میراث په توګه د یونسکو په سازمان کې ثبت کړي.
په دې اړه افغان لیکوالو او فرهنګیانو غبرګون ښودلی او په خپلو فسبوک پاڼو کې له دولت نه غوښتي، چې د ایران او ترکیې هېواد د دې کار مخه دې ونیسي.
په دې اړه د بلخ پوهنتون استاد صادق عصیان وايي، چې معنوي، مثنوي د مولانا جلاالدین محمد بلخي مهم اثر دی او باید افغان حکومت یې د یو فرهنګي میراث په توګه د یونسکو په سازمان کې ثبت کړي.
عصیان حکومت د افغانستان د فرهنګي میراثونو د خوندي ساتلو په برخه کې په ناغېړۍ تورنوي او زیاتوي، که حکومت په دې برخه کې لاس په کار نه شي، د فرهنګیانو ملاتړ به له لاسه ورکړي.
نوموړي له ټولو کلتوري بنسټونو وغوښتل، چې په دې اړه عدالت غوښتنه وکړي او زیاته یې کړه، چې دولت باید د یونسکو غړو هېوادونو سره اړیکه ونیسي، چې دغه موضوع له ملګرو ملتونو سره شریکه کړي.
شاعر او لیکوال روح الامین امیني په دې اړه وايي، چې د مولانا معنوي، مثنوي اثر باید د ټولو فارسي ژبو د کلتوري میراث په توګه د یونسکو په سازمان کې ثبت شي.
امیني وايي، چې مولانا او د فارسي ژبې نور مهم شخصیتونه دې ته اړتیا نه لري، چې په یونسکو کې ثبت شي؛ په وینا یې د یونسکو له خوا یو کال د مولانا جلاالدین بلخي په نوم نومول شوی، دا خپله د فارسي ژبې فرهنګي شخصیتونو نړیوال شهرت ښيي.
دی وايي، چې د ترکیې دغه اقدام دخندا وړ دی او حکومت باید په افغانستان کې د ترکیې فسارت استازي احضار کړي.
په ورته وخت کې د اجرایوي ریاست فرهنګي سلاکار سید حسین فاضل سانچارکي له سلام وطندار سره په مرکه کې وویل، چې حکومت د ایران او ترکیې د دغه اقدام په تړاو یونسکو ته خبر ورکړی او دغه سازمان به د افغانستان له خوښې پرته کوم کار ونه کړي.
سانچارکي وايي، چې د مولانا مثنوي، معنوي د ټولې نړۍ فرهنګي سرمایه ده او هېڅ هېواد نه شي کولی، چې دغه ستر اثر په خپل نوم مصادره کړي.
لیکوال او شاعران وايي، چې د ایران دولت له دې مخکې هم ځېنې د فارسي مشاهیر په خپل نوم کړي دي او دا د ایران وروستي او لومړنۍ کار هم نه دی.
