په اطلاعاتو او فرهنګ وزارت کې یوې موثقې سرچينې، چې نه يې غوښتي نوم يې واخیستل شي سلاموطندار ته ویلي، اوسمهال د اطلاعاتو او فرهنګ وزارت سرپرست کمال سادات پرته د ولسمشر له حکمه د وزارت د سرپرستۍ چارې پر مخ بیايي.
د سرچینې پر وینا، هغه یوازې د دغه وزارت پخواني وزیر عبدالباري جهاني لهخوا د سرپرست په توګه ګمارل شوی دی.
د کمال سادات له سرپرستۍ شاوخوا ۴ میاشتې تېريږي.
له بل لوري د اطلاعاتو او فرهنګ وزارت ځایناستی کمال سادات هم سلاموطندار سره د خبرو اترو پرمهال تایید کړه، چې د پخواني وزیر په دستور يې دغه دنده پېل کړې.
د ویلو ده، چې عبدالباري جهاني په تېر لړم میاشت کې د ورپېښې ناروغۍ له امله خپله له دندې استعفا وکړه.
په هغه وخت کې کمال سادات د ځوانانو چارو مرستیال و.
خو سادات وايي، چې د هغه د سرپرستۍ پروسه قانوني پر مخ تللې ده.
د سرپرستۍ د قانون لهمخې باید د سرپرستۍ حکم د هېوادمشر لهخوا صادر شي، خو لیدل کيږي، چې د کمال سادات په ګمارلو کې د ولسمشر هیڅ حکم نشته، خو له دې سره ـ سره هغه د څلورو میاشتو راهیسې د همدغې وزارت په استازیتوب د نورو خبري غونډو او رسمي ناستو په ګډون حتا د وزیرانو شورا په غونډو کې هم ګډون کوي.
په ډاګه دې، چې پهدې اړه د ولسمشرۍ ماڼۍ د ویاند مرستیالانو له نظر ورکولو ډډه کړې.
