.jpg)
ولسمشر محمد اشرف غني وايي، پاکستان په وضاحت سره اقرار وکړ، چې دوی وسله وال طالبان د سولې خبرو اترو میز ته نه شي حاضرولای.
هغه زیاته کړې، چې د تلپاتې سولې له پاره باید افغانان ۶ میاشتې د جګړې زغم په ځان کې پېدا کړي.
نوموړی، چې تېره شپه(مارچ ۱۸مه) د ملي شورا غړو ته په ارګ کې وینا کوله زیاته کړه، افغانان د سولې په برخه کې زیاتې قربانۍ ورکړي او " دغه د زهرو تحمیلي جام" به هم وڅښي.
ولسمشر وویل، چې د جګړې له پاره افغان حکومت پوره چمتووالی او د وسله والو طالبانو هر راز برید ته د ځواب ورکولو توان لري.
همدارنګه هغه زیاته کړه، چې که افغان حکومت دفاعي اراده و نه لري، نو د میز پر سر سولې ته رسېدل ګران کار دی.
هغه دا هم وویل، چې د لومړي ځل له پاره افغان حکومت نړېوالو ته دا قناعت ورکړ، چې پاکستان له افغانستان سره په یو نا اعلان شوي جنګ اخته دی.
غني د مشرانو او ولسي جرګو استازو ته وویل، چې له دې وړاندې افغانستان په یو انزوا کې وه او اوس د تروریزم سره د مبارزې په برخه ټول نړېوال د افغانستان ملاتړ کوي.
هغه په دولت کې له ځينو جاسوسانو هم خبر ورکړ، چې ګوندې داسې کسان هم شته، چې د سرحدي پولیسو د ضعف ټکي پاکستاني سرحدي ځواکونو ته ورکوي او هغوی بیا د کرښې دېخوا ته مخکې تګ کوي.
نوموړي زیاته کړه: " جاسوسان به له دې وروسته په حکومت کې ځای و نه لري".
دا په داسې حال کې ده، چې نن په کابل کې د یوې زورورې چاودنې او ځانمرګي برید وروسته شاوخوا ۳۰ تنه و وژل شول او ۳۲۷ تنه نور ټپيان شول.
