د افغانستان د بشري حقونو خپلواک کمیسیون قطر کې د بینالافغاني خبرو پیل سره هممهاله دغو خبرو کې د اصلي رکن په توګه د جګړې د قربانیانو د حقونو پر خوندیتوب ټینګار کړی او له دواړو لوريو یې غوښتي چې دغه رکن په رسمیت وپېژني.
دغه کمیسیون د شنبې په ورځ یوه اعلامیه کې د حکومت او طالبانو ترمنځ د خبرو د پیل هرکلی کړی او ویلي يې دي چې د سولې خبرې د جګړې او د افغانانو د ستونزو پای ته رسولو لپاره یو بېساری فرصت دی.
اعلامیه کې هیله څرګنده شوې چې د سولې خبرو اصلي پایله تلپاتې سوله وي، ترڅو په کې افغانان له باعزته ژوند او برابرو فرصتونو برخمن وي.
د بشري حقونو کمیسیون ویلي، د سولې خبرې باید د افغانستان اوسنۍ متنوع ټولنې ته انعکاس ورکړي.
د بینالافغاني خبرو پرانیستونکې غونډه د شنبې په ورځ د قطر دوحې کې وشوه.
