د غزني اوسېدونکو د چهارشنبې ورځ په دغه ولایت کې د ناامنیو زیاتېدو له کبله لاریون وکړ. دغو معترضانو پرون د اعتراض په توګه پرلت هم وکړ.
اوس چې د معترضانو شمېر زیات شوی، نن یې د کابل-کندهار لویه لاره وتړله. دوی وايي، تر هغه یې چې حکومت غوښتنې و نه مني، لاریون ته به دوام ورکړي او یاده لویه لاره به هم خلاصه نه کړي.
معترضان په غزني کې بنسټیز بدلونونه غواړي او پر حکومت غږ کوي چې د دغه ولایت والي او امنیتي چارواکي له دندو ګوښه کړي.
دوی د جګړې په مدیریت کې د غزني والي او امنیتي چارواکي پر کمزورۍ تورنوي او وايي، د محلي مسوولانو بېپروايي، د امنیتي ځواکونو د مرګژوبلې زیاتېدو لامل شوې ده.
یو معترض عبدالباري سلاموطندار ته ویلي چې د وژل شویو امنیتي ځواکونو جسدونه او ټپیان څو ورځې د جګړې په ډګر کې پاتې کېږي او هغوی ته د مرستې نه رسېدل لامل کېږي چې طالبان یې یرغمل کړي.
د غزني محلي او امنیتي چارواکي تر اوسه په دې اړه خبرو کولو ته نه دي حاضر شوي، خو د غزني د امنیې قومانداني ویاند احمدخان سیرت په جګړه کې مدیریتي کمزوري نه مني او وايي، په دې وروستیو کې د پولیسو په لیکو کې بنسټیز اصلاحات راغلي دي.
