د هرات ولایتي شورا رییس د سوداګرۍ وزیر او د یو شمېر پانګوالو په موجودیت کې د حکومتي چارواکو د کړو ژمنو د نه عملي تر څنګ دې ته هم اشاره وکړه، چې مرکزي حکومت تل د هرات په ادارو او چارو کې د سمون او تنظیم راوستلو په اړه ژمنې کړي، خو هیڅکله یې عمل پرې نه دی کړی.
د شورا رییس هغه مهال دغه څرګندونې وکړې، چې د سوداګرۍ وزیر همایون رسا د پانګوالو پر وړاندې د خنډونو او په هېواد کې د ګازو د بیو د لوړېدلو په پار د (سه شنبې) پر ورځ هرات ولایت ته سفر تللی و.
د هرات ولایت د ولایتي شورا رییس کامران علي زايي حکومت په بې پروايئ تورن کړ او وویل، چې د حکومت لوړپوړو چارواکو پر ملاتړ د نفتي موادو یو شمېر شرکتونه بې له ګمرکه د "معافي تیلو" په نوم نفت واردوي.
ده زیاته کړه، چې د سوداګرۍ وزارت دغې مسلې ته تر اوسه پورې هیڅ ډول پاملرنه نه ده کړې.
ده همداراز وویل، چې د "فردس" په نوم د نفتي موادو شرکت یې یوه بېلګه ده، چې د روان میلادي کال له پیل نه د ایساف په ملاتړ سره یې د معافي تیلو په نوم نفتي توکي بې له ګمرکه واردوي.
د دغه ولایت د ولایتي شورا رییس په داسې حال کې دغه څرګندونې کوي، چې په تېرو دوو اونیو کې ۳ وزیران هرات ولایت ته په سفر لاړل او په خپلو لیدونو کې يې د سمون راوستلو او اقتصادي حالت د ښه والي لپاره ګڼې ژمنې کړې وې.
په دې ناسته کې د هرات ولایت پانګوالو د حکومت پر دوه ګوني چلند نیوکې وکړې.
د هرات ولایت د صنعت کارانو د اتحاديي مشر حمیدالله خادم د پانګوالو په استازیتوب خبرې وکړې، نوموړي وویل، چې د هرات ولایت پانګوال له تېرو لسو کلونو راهیسې له ستونزو سره مخ دي او د له منځه وړلو لپاره یې حکومتي چارواکو او ولسمشر ته ویلي دي، خو لا یې هم ستونزې نه دي حل شوي.
خادم وویل، چې د هرات ولایت د صنعتي، اقتصادي او امنیتي موقعیت د له منځه وړولو لپاره لا د مخه پلان جوړ شوی و.
د هرات ولایت د صنعت کارانو اتحادیي مشر وویل، چې د ګمرکي تعرفو لوړېدل، ناامني، د صنعتي ښارګوټي څلورم فاز نه توزیع کېدل او پانګوالو ته د زمېنې نه برابرول؛ د یاد ولایت د پانګوالو له هغو ستونزو څخه دي، چې لا هم حل شوي نه دي.
له دې ټولو ستونزو سره د سوداګرۍ وزیر محمد همایون رسا د هرات ولایت پانګوالو ته وویل، چې حکومت د پانګوالو د ستونزو د له منځه وړلو لپاره بنسټیزه طرحه لري، چې د سوداګرۍ او صنعت په برخه کې په یوې ستراتېژۍ کار کوي او په یاده ستراتېژۍ کې دغه ټولې ستونزې په پام کې نیول شوي دي.
د سوداګرۍ وزیر له پانګوالو نه وغوښتل، چې په دې برخه کې زغم او صبر نه کار واخلي. ده زیاته کړه، چې ډېر ژر به د سوداګرۍ او صنعت په برخه کې د اساسي بدلونونه راشي.
