د نورو ورځو خلاف وروستیو کې د غزني په سړکونو او څلور لارو کې د پوځي ځواکونو حضور زیات شویدی. له پرون راهیسې د غزني ډېری هټي، مارکېټونه او صرافۍ تړلي دي او ښار د نیمې ورځې رخصتۍ وضعیت غوره کړیدی.
د غزني اوسېدونکي د دې ولایت د حالاتو ترینګلکېدا په اړه اندېښنه ښيي او تمه لري چې دولت د خبرو له لارې دغه وضعیت ته د پای ټکی کېږدي.
د لویې لارې دواړو خواوو ته زرګونه مسافرین د لارې پرانیستو ته په تمه دي او سوداګر وايي، د لارو تړل کېدلو له امله، تاواني شويدي.
بلخوا د غزني پولیسو قومندان جنرال محمدزمان چې د یو لوړپوړي پلاوي په مشرۍ قرهباغ ولسوالۍ ته تللی، وايي چې څو ورځې مخکې یې د شېراباد سیمې د برید په تړاو ځېنې کسان په نښه کړيدي.
د غزني ولایت رسنیز دفتر مسوولان وايي، د حکومت له لوري یو بل پلاوی هم د غزني قرهباغ ولسوالۍ پېښې څېړلو لهپاره سیمې ته رسېدلی او خپل کار یې پیل کړیدی.
په ورته وخت کې هغو اعتراضګرو چې د کابل ـ کندهار لویه لاره یې تړلې؛ وايي چې د غزني له چارواکیو سره شریکې کړې غوښتنې یې عملي نهشي؛ اعتراضونو ته به دوام ورکړي.
دوی ادعا کوي چې حیدراباد پول سیمه کې یې پولیسو د عدالت غوښتنې خېمه په زوره چپه کړې او درې کسان یې وهل شويدي.
دغه اعتراضکوونکي همدارنګه زیاتوي چې پنځه ورځې مخکې د نیخته کلي اوسېدونکیو په شېراباد کلي برید کړی چې د دې کلي دوه تنه یې وژلي، دوه یې ټپيان کړي او دوه نور یې له ځان سره بیولي دي.
خو د نیخته سیمې اوسېدونکي بیا دا ادعاوې بېبنسټه بولي.
