غور کې پر نشو د روږدو کسانو ۲۰بستریز روغتون رییس محمدعمر لعلزاد سلام وطندار ته وویل چې دې روغتون ته د ډېرو روږدو کسانو مراجعه د دې سبب شوېده چې د ناروغانو نوملړ ثبت او له هغه وروسته یې په نوبتي ډول درملنه پیل کړي.
ښاغلي لعلزاد زیاته کړه چې دا روغتون د دې ولایت یوازې ۵ سلنه روږدو کسانو ته بسنه کولی شي.
د نوموړي په وینا، هره ورځ له ۵ تر ۶ په نشو روږدي کسان دغه مرکز ته راځي چې ښځې او ماشومان هم پهکې شامل دي.
غور کې پر نشو د روږدو کسانو ۲۰بستریز روغتون وايي چې دوی د بسترونو نهشتوالي ترڅنګ د اعاشې او د ناروغانو سرګرمۍ لهپاره د ځای له نهشتوالي سره هم مخ دي.
د غور ولایتي شورا غړی سخي جاوید هم پر نشو د روږدو کسانو د لوړې شمېر په اړه د اندېښنې ښودلو ترڅنګ وايي چې پهدې ولایت کې پر نشو زیاتره روږدي کسان هغه څوک دي چې د نشهيې توکیو له زیانه بېخبره دي او یا هم کډوالۍ پر نشو رودي کړي.
ښاغلی جاوید هم له حکومته غوښتنه کوي چې پر نشو د روږدو کسانو روغتون ته پام وکړي او ظرفیت يې لوړ کړي.
د غور عامې روعتیا رییس عبدالطیف رحیمي هم د دې ستونزې په تایید سره وايي، د درمل شویو کسانو لهپاره د کاري موکو نهشتوالی د دې سبب شوی چې هغوی یو ځل بیا پر نشو روږدي شي.
ښاغلي رحیمي زیاته کړه، دوی څو ځلې له حکومت سره د دې روغتون د کافي ظرفیت د نهشتوالي ستونزه شریکه کړې؛ خو تراوسه ورته پام نهدی شوی.
په ۲۰۰۵ زېږدیز کال کې د دې ولایت پر نشو د روږدو کسانو۲۰بستریز روغتون مسوولانو د سروې پر بنسټ، په غور کې څه باندې ۵۰ زره پر نشو روږدي کسان موجود وو چې اوس له هغې مودې راهیسې نور هم زیات شویدي.
