د بغلان د امن خونې یوه ساتونکي خپله ښځه په زندۍ کولو وژلې

د بغلان ښځو چارو رییسې خدیجه یقین سلام‌وطندار ته وویل، چې د دغې ښځې مېړه د پلخمري ښار " قول‌کرکر" سیمې اوسېدونکی دی او همدارنګه د بغلان ولایت په امن خونه کې د ساتونکي په صفت دنده ترسره کوي.

د نوموړې پر خبره، دغه سړي تېره شپه خپله ښځه په زندۍ کولو وژلې ده.

د یاد ولایت د ښځو چارو ریاست د مسوولینو پر خبره، د دوی د واده ثمره ۵ ماشومان دي.

د بغلان د پولیسو مطبوعاتي امر ذبیح‌الله شجاع هم پېښه تاییدوي او وايي، چې د دغې پېښې عامل له سیمې تښتېدلی او پولیس يې د نیولو هڅې کوي.

شجاع زیاته کړه، چې تر اوسه د دغه قتل اصلي انګیزه نه‌ده معلومه.

د بغلان سیمه‌ییز چارواکي وايي، چې د وژل شوې ښځې جسد د پلخمري ولایتي روغتون عدلي طب ته لېږدول شوی دی.

د بغلان د عامې روغتیا مرستیال ډاکټر عبدالعلیم غفاري وايي، چې د دغې ښځې د بدن په ځينو برخو کې د شکنجو او وهل ټکولو نښې هم لیدل کیږي.