اجرايوي مشر ډاکټر عبدالله عبدالله وايي، چې له دې وروسته به افغان امنيتي ځواکونه د دولت مخالفو وسله والو د مشرانو په وژلو لاس پورې کوي او د دوی هر رهبر او قومندان به د دغو ځواکونو له خوا په نښه کېږي.
اجرايوي مشر نن چهارشنبه د (۲۰۱۵ د جون ۱۷) په هېواد کې د بهرنیو سرتېرو له عمومي قومندان جنرال جان ایف کمبل سره په لیدنه کې زياته کړه، چې د مخالفینو د رهبرۍ په نښه کول د امنیتي وضعیت له ښه کېدا سره مرسته کوي او له دې وروسته به دا چاره په ټول قوت سره ادامه پیدا کوي.
د هېواد اجرايوي رییس په داسې حال کې دا څرګندونې کوي، چې په تېره اوونۍ په پېښور ښار کې د طالبانو له لوري د ننګرهار ولایت له پاره ټاکل شوی والي په مرموز او پټ ډول ووژل شو.
د اجرايوي ریاست له خوا په خپره شوې خبر پاڼه کې ليکل شوي، ډاکټر عبدالله له جان ایف کمبل سره په خبرو کې ويلي، چې د افغان ملي امنیتي ځواکونو ترمنځ د استخباراتي معلوماتو د شریکولو پروسه هم چټکه شوې او د دغې سلسلې د چکټیا له پاره کارونه په بيړه روان دي.
ډاکټر عبدالله عبدالله د بهرنیو سرتېرو له عمومي قومندان څخه د استخباراتي معلوماتو شریکولو او هوايي ځواکونو د پیاوړتیا له پاره د نورو هڅو غوښتنه کړې او په دې برخه کې يې سمدستي فعالیت اړين ګام بللی دی.
ده زياته کړې، چې د افغان سرتېرو قرباني د ستایلو وړ دي او حکومت به د دوی د قربانيو څخه د ځانګړو مراسمو په ترڅ کې مننه وکړي.
په دې ليدنه کې په افغانستان کې د بهرنيو سرتېرو عمومي قومندان ويلي، چې دوی له افغان ځواکونو سره په ګډه د مشورې او روزنې پروګرامونه پلي کوي.
نوموړي وویل، بهرني ځواکونه له افغان ځواکونو سره کار کوي، چې د یاد پوځ هوايي برخه نوره هم فعاله او پر وسله والو يې د بريد توان زیات شي.
کمبل وویل، چې د افغان هوايي پوځ د پياوړتيا له پاره به پوځي چورلکې اخلي او پر نورو لوژستيکي چورلکو د ترميمولو چارې هم پیل شوي دي.
اخوا بیا د اجرايوي مشر ډاکټر عبدالله عبدالله له لوري د روژې په باب په خپاره شوې پیغام پاڼه کې د وسله والو څخه غوښتل شوې، چې که د سولې ليواله وي، نو افغان وژنه دې بس او د افغان حکومت سره دې يوځای شي.
له بل لوري د هلمند مدني ټولنې مشر او غړي يې د افغانستان په روانه جګړه کې په ښکېلو خواو غږ کړی، چې د روژې په مبارکه مياشت کې دې له جګړې لاس واخلي، چې خلک ارام ژوند او عبادت وکړي.
د هلمند مدني ټولنې مشر سردار محمد همدرد وايي، دا چې روژه د برکتونو او عبادت مياشت ده او همدارنګه د دې له پاره چې خلک ارام ژوند وکړي او پرته له کومې امنيتي اندېښنې مسجدونو او عبادتځايونو ته ولاړ شي، نو ښکېلې خواوې دې جګړه بنده کړي.
