په دې وروستیو کې د ولسمشر غني له لوري په بهرنیو چارو وزارت او ځینو سفارتونو کې له ګمارنو وروسته، اجرایه رییس او د ثبات او همپالنې ټاکنیز ټیم مشر عبدالله عبدالله نن په سپېدار ماڼۍ کې په يوه خبري غونډه کې وويل چې له دې وروسته په حکومت کې د یو اړخیزو او خپلسرو ګمارونو تحمل نه لري.
عبدالله عبدالله خبرداری ورکړ چې که ولسمشر غني له یو اړخیزو او خپلسرو ګمارنو لاس وا نه خلي، د قانون او د ملي یووالي حکومت جوړېدو له هوکړه لیک سره سم به جدي ګامونه پورته کړي.
نوموړي زیاته کړه چې د ولسمشر له خوا یو اړخیز او سلیقهيي ګمارنې په نظام کې د ګډوډۍ لامل شوي او حکومتي بنسټونه یې کمزوري کړي دي.
دغه راز اجرايیه رییس وویل چې که څه هم ده په هېواد کې د ثبات ساتلو لپاره ډېره حوصله وکړه، خو د ولسمشر غني په چلند کې هېڅ ډول تغییرات را نه غلل او زياته يې کړه چې د سولې او حکومتولۍ په برخه کې د ولسمشر غني پروګرامونه د امنیتي ځواکونو د مرګژوبلې زیاتېدو لامل شوي او د ارګ پراخ فساد د رسنیو سرخط جوړ شوی دی.
په دې ناسته کې د عبدالله عبدالله متحدینو له نوموړي غوښتنه وکړه چې د ولسمشر غني پر وړاندې ودرېږي او دی هم په خپل سري ګمارنو لاس پورې کړي.
د عبدالله عبدالله پلویانو د ولسمشر غني پر کړنو او ګمارنو نیوکه وکړه او دغه ګمارنې یې سلیقهيي وګڼلې.
