د سولي عالي شورا سلاکار عبدالحکیم مجاهد چې تېره پنجشنبه یې په یوه غونډه کې طالبان د سولې فرښتې بللي وو او ډاکټر نجیب الله، برهان الدین رباني او احمدشاه مسعود ته یې توهین کړی و؛ له دندې ګوښه شو.
د اجرایوي ریاست ویاند مجیب الرحمان رحیمي سلام وطندار ته وویل، چې ښاغلی مجاهد وروسته له دې د سولې عالي شورا د یو غړي په توګه دنده نه شي اجرا کولی.
عبدالحکیم مجاهد په یوه غونډه کې طالبانو ته د فرښتو خطاب کړی و او هغوی یې یوه سپېڅلې ډله بللې وه. هغه د افغانستان پخواني ولسمشر ډاکټر نجیب الله ته د خاین، احمدشاه مسعود ته د بغاوتګر او د سولې شهید برهان الدین رباني ته د افغانستان د ګډوډوونکي خطاب کړی و.
د مجاهد له دې خبرو سره هم مهاله د بېلابېلو سیاسي ډلو له خوا غبرګونونه راپورته شول.
ولسمشرۍ ماڼۍ هم د یوې خبرپاڼې په خپرولو سره ویلي وو، چې دوی د افغانانو قاتلانو ته د سولې د فرښتو لقب ورکوونکیو سره سخت مخالف دي.
خبرپاڼه کې دا هم راغلي وو، چې هېچاته به اجازه ورنه کړي، چې د بیان له ازادۍ ناوړه ګټې اخیستنې سره د خلکو او په ځانګړي توګه د ماشومانو او مېرمنو قاتلان او هغه کسان چې مقدس ځایونه او عامه شتمني له منځه وړي؛ د سولې د فرښتو خطاب وکړي.
عبدالحکیم مجاهد په خپله تر اوسه په دې اړه څه نه دي ویلي.
