د افغانستان لپاره د روسیې ځانګړي استازي ضمیر کابلوف د امریکا د استخباراتو یوشمېر غړي په افغانستان کې د نشهيي توکو پر قاچاق تورن کړي دي.
د روسیې ټاس خبري اژانس د کابلوف له قوله لیکلي، د امریکا هغه استخباراتي غړي چې د امریکايي سرتېرو د وژلو لپاره پر روسیې د طالبانو د ملاتړ تور لګوي، خپله په افغانستان کې د نشهيي توکو په قاچاق کې لاس لري.
د دغه راپور پر بنسټ، کابلوف یادې څرګندونې د روسیې له یوې ټلوېزیونې شبکې سره کړې دي.
د ټاس د راپور له مخې، کابلوف ویلي: «د امریکا دغه حیرانوونکي استخباراتي افسران چې پر موږ بېلابېل تورونه لګوي، د نشهيي توکو په قاچاق کې لاس لري. د هغوی الوتکې له کندهار او بګرام نه الوځي او هر ځای چې وغواړيـ المان، رومانیا ته ـ له کومې څېړنې پرته ځي.»
کابلوف زیاته کړې چې د کابل ټول اوسېدونکي په دې اړه خبر دي او تیار دي چې خبرې وکړي.
د افغانستان حکومت او امریکا تر اوسه په دې اړه څه نه دي ویلي.
تر دې وړاندې نیویارک ټایمز ورځپاڼې لیکلي و چې د امریکا د اطلاعاتي چارواکو د څېړنو پر بنسټ، د روسیې یوې اطلاعاتي نظامي ډلې د سولې خبرو اترو پر مهال طالب جنګیالیو ته پټې پیسې ورکړي، څو په افغانستان کې د ناټو ځواکونه، په تېره امریکايي سرتېري ووژني.
خو روسیې او طالبانو دا راپور رد کړی دی.
د ۲۰۱۹ کال پر مهال چې د روسیې له لوري د امریکايي ځواکونو د وژلو لپاره طالبانو ته د پیسو د ورکړې ادعا شوې، شاوخوا ۲۰ امریکايي سرتېري وژل شوي دي.
