فاریاب ولایتی کشفی اداره مسؤول‌لری‌نینگ ایتیشیچه، جنگری طالب‌لر اوتگن (پنج‌شنبه کون) مذکور ولایت‌نینگ خواجه سبزپوش تومنی‌دن اوغیرله‌گن 50 یولاوچی‌دن ایکی کیشی‌نینگ آتیب اولدیرگن.
اوتگن (پنج‌شنبه کون، 6- حوت) بیر 404 اتوبوس و اوچ کرولا و سراچه موترلری‌نینگ 50 یولاوچی‌سی، خواجه سبزپوش تومنی «گورزاد کوتلی» یقینی «ریگ‌ریشن» منطقه‌سیده، قورال‌لی طالب‌لر تامانیدن اوغیرلنگن.
خواجه سبزپوش ولسوالی عبدالله معصومی‌نینگ سلام‌وطندارگه ایتیشیچه، اوشبو یولاوچی‌لرنینگ برچه‌سی تینچ اهالی بولیب، ایران باره یاتگن ایکن.
جناب معصومی‌نینگ ایتیشیچه، اوتگن کیچه ساعت 9 ده، اوشبو یولاوچی‌لرنینگ 46 ته‌سی طالب‌لر تامانیدن قوییب یوباریلگن و یولاوچی‌لردن بیری امنیتی کوچلر بیلن طالب‌لرنینگ اورته‌سیده یوزبیرگن توقنه‌شوو جریانیده یره‌لنگن.
شونینگ‌دیک، فاریاب‌ده‌گی طالب‌لرنینگ قومندانلریدن بیری قاری محمدیوسف حقانی، مذکور یولاوچی‌لردن ایکی کیشی آتیب اولدیریلگنینی ایتگن.
اونینگ ایتیشیچه، اوشبو گروه جنگری‌لری، اوتگن (کون کیچ قورون) خواجه سبزپوش و شیرین‌تگاب تومن‌لری‌نینگ قتناو یولینی ایکی ساعت توسگن و یولاوچی‌لرنی تیکشیرگنی‌دن کیین، 3 کیشی‌نی اوزلری بیلن آلیب کیتگن. اونگه کوره، جنگری طالب‌لر تامانیدن اولدیریلگن ایکی کیشی حربی عسکری و باشقه بیری هم بنگی ایکن.
فاریاب ولایتی ملی حربی بیرینچی لوا رسمی‌لری هم بو واقعه‌نی تصدیق‌له‌یدی؛ بیراق ایتیشیچه، حاضرگه قدر هلاک بولگن کیشی‌لرنینگ حربی عسکر بولگنی و بولمه‌گنی بیللی ایمس.
بو تورتینچی مرته کیم، قورال‌لی طالب‌لر اوتگن (اوچ هفته) جریانیده میمنه- بلخ قتناو یولی‌دن یولاوچی‌لرنی اوغیرله‌یدی.
