غزنی ولایتیده یوزبیرگن ترافیک حادثهده، بیش ایرکک، ایکی عیال و ایکی باله جان بیرگنلر. بو واقعه پنجشبنه کونی، ایرتهلب بیر 303 تیپلی یوللاوچیسی بولگن موتر باشقه بیر سراچه رسوملی موتر بیلن توقنشگنی باعث یوزبیرگن.
غزنی ترافیک مدیری محمدالله احمدینینگ سلاموطندارگه ایتیشیچه، بو واقعه 303 بس موتر کابلدن قندهار تامان کیتهیاتکن بیرچاغده، غزنی مرکزیگه تیگیشلی «غازی قلعه» منطقهسیده غزنیدن کابل تامان کیتهیاتکن بیر سراچه موتری بیلن توقنهشیب یوزبیرگن.
غزنی ترافیک مدیرینینگ ایتیشیچه، هیداووچیسینینگ تفاوتسیزلیگی سبب روی بیرگن.
شونینگدیک، غزنی دولت کسلخانهسی باشلیغی داکتر بازمحمد همتنینگ ایتیشیچه، بوگون ایرتهلب ساعت 5 ده 9 جسد بو کسلخانهگه انتقال بیریلگن، هلاک بولگنلر ایچیده ایکی عیال و ایکی بالههم کوزهتیلگن.
جناب همتگه کوره، بو واقعهده هلاک بولگنلرنینگ برچهسی، سراچه موتر یوللاوچیسی بولیب، غزنی ولایت یشاوچیلری دیر. اونینگ کوپهیتیریشیچه، هلاک بولگنلرنینگ عایلهسی جسدلرنی انتقال بیریش اوچون کسلخانهگه کیلگنلر.
ایتیلیشیچه، غزنیده ترافیک واقعهسی کوپ یوز بیرهدی. بوندن نیچه پیت آلدین، مذکور ولایتده بیر یوللاوچی تاشیدیگن بس تیپلی موتر قولگنی باعث، 29 یوللاوچی یرهلنگن ایدی.
ترافیک اداره مسؤوللرینینگ ایتیشیچه، کابل – قندهار قتناو یولی مملکتده اینگ خطرلی یول سنلهدی. یول خرابلیگی، هیداو.چیلر احتیاط سیزلیگی و یولیانیده ییرلشتیریلگن ماینلر پارتلهشی ییلده یوزلرچه انساننینگ حیاتیگه نقطه قویهدی.
مملکتده اوشبو هفته جریانیده بو ایکینچی ترافیک حادثهسی دیر. ایکی کون آلدین، فاریاب پولیس تانکلریدن بیری باشقه بیر ریکشا بیلن توقنشگنی باعث، بیر عیال و بیر محلی پولیس هلاک و باشقه تورت کیشی یرهلنگن ایدی.
