د زابل سیمهییز چارواکي وايي، چې وسلهوالو طالبانو له تېرو دوو میاشتو راهیسې پلان لرلو، چې د زابل مرکز سقوط کړي؛ خو ونهشول.
د زابل والي بسمالله افغانمل له سلام وطندار سره په خبرو کې وویل، چې تېره شپه یو ډله وسلهوالو طالبانو د شاهجوی ولسوالۍ د «چینو او هولان» په سیمو کې پر یو شمېر امنیتي پوستو بریدونه کړيدي.
د ده په خبره، تراوسه پهدې بریدونو کې ۲۰ پولیس وژل شوي او له ۱۰ زیات نور ټپیان شويدي.
ښاغلی افغانمل وايي، په «ده چوپان» ولسوالۍ کې هم د وسلهوالو په برید کې ۴ پولیس ټپیان شويدي.
افغانمل همدارنګه زیاتوي، چې سیمي ته يې تازه پولیس لېږلي او اوسمهال هلته امنیت دی.
د ده پر وینا، وسلهوالو ته هم زیاته مرګ و ژوبله اوښتې ده؛ خو کره شمېره یې نهلري.
د زابل والي وايي، د یادو بریدونو هم مهاله پر مرکز کلات باندې هم تر لسو زیات توغندي لګېدلي.
افغانمل وايي، دغه توغندۍ د ولایت مقام او امنیې قوماندانۍ سره نږدې لګېدلي؛ خو د سر تاوان نهلري.
افغانمل دا هم وویل، چې وسلهوال غواړي، چې پهدې ډول خلک ووېروي؛ مګر د دوی او ټولو څانګو مورال قوي دی او هېڅ ډله نهشي کولی، چی د زابل مرکز امنیت ګډوډ کړي.
قاري یوسف احمدي، چې ځان په سویل کې د وسلهوالو طالبانو ویاند معرفي کوي، وايي، د تېرې شپې په بریدونو کې يې ګڼ شمېر پولیسو ته مرګ ژوبله اړولې او د خپلو ملګرو د مرګ ژوبلې خبره نه مني.
زابل د کابل کندهار پر لویه لاره پروت ناامنه ولایت دی، چې د دې ولایت «خاک افغان» ولسوالي له یوې لسیزي راهیسې د دولت د وسلهوالو مخالفانو په لاس کې ده.
یو شمېر سرچینې وايي، چې په یاده ولسوالۍ کې د داعش، وسلهوالو طالبانو او ان د ایغور په نامه وسلهوال له خپلو کورنیو سره ګډ ژوند کوي.
د سرچینو په باور، له یادي ولسوالۍ څخه نورې لېرې او نږدې ولسوالۍ هم اکثره وخت ناامنه او تر ټولو زیات تاوان يې عامو زابلیانو ته رسېږي.
د زابل اوسېدونکي له دولته غواړي، چې د دوی د سر او مال ساتنې ته نه یوازې په مرکز کلات بلکې په لېرې ولسوالیو کې هم د خپل مسوولیت له مخې پاملرنه زیاته کړي.
