د افغانستان او ترکمنستان امنیتي ځواکونه د ترهګرو د ځپلو په پاره د دواړو هېوادونو تر منځ په پرته ګډه پوله کې پر یووخت عملیات پيل کوي.
د دواړو هېوادونو امنیتي ځواکونه چمتو دي، چې د ترهګرو د منځه وړلو له پاره عملیات پيل کړي.
د ولسمشر لومړی مرستیال جنرال عبدالرشید دوستم وايي، چې وسله وال طالبان د جوزجان ولایت خماب ولسوالۍ څخه تښتېدلي او د افغانستان او ترکمنستان تر منځ په سیمې کې ځای پر ځای شوي دي.
نوموړي وویل، چې ډېر ژر به د وسله والو طالبانو د له منځه وړلو له پاره د ترکمنستان امنیتي ځواکونو په مرسته همزمانعملیات پيل کړي.
دوستم وايي، د ترکمنستان پوله ساتو ځواکونو هم د وسله والو طالبانو موقعیت په نښه کړی دی او د ځپلو له پاره به یې همزمان عملیات پيل شي.
دوستم د جوزجان ولایت په خم اب ولسوالۍ کې رسنیو سره په خبرو کې د همزمانو عملیاتو خبر ورکړ، خو د پيل کره وخت په اړه یې څه نه دي ویلي.
د ولسمشر لومړی مرستیال په داسې حال کې د همزمان عملیاتو د پيل خبره کوي، چې له دې مخکې افغان حکومت څو ځلې ویلي وو، په افغانستان له ترهګرۍ سره روانه جګړه د ټولې سیمې د ټیکاو له پاره ده او قربانيان یې افغان سرتېري دي.
جمهوری ریاست وايي، چې په افغانستان کې روانه جکړه سیمه ییز اړخونه لري او نړیواله ټولنه باید د دې سیمه ییزې ستونزې په حل کې له افغانستان سره مرسته وکړي او له ترهګرۍ سره په مبارزه کې سیمه ییزه اجماع رامنځته شي.
بل لورته د منځۍ اسیا هېوادونو په افغانستان کې د روانې جګړې په اړه اندېښنې لري او په ورته وخت کې روسيې هم د افغانستان په ۲۵ ولایتونو کې د داعش ډلې په فعال حضور باندې اندېښنې څرګندې کړې وې.
په دې اړه له افغانستان سره د روسیې د پوځې مرستو او ان ځېنو رسینو کې د سوريې په شان په افغانستان کې د روسیې د هوايي بریدونو د احتمال خبرې کېدلې، چې د ولسي جرګې مرستیال په مشرۍ یو پلاوی روسیې ته لاړه او هلته یې د ټولو اندېښنو په اړه روسیې چاروکو سره خبرې وګړې.
دغه پلاوي له روسانو غوښتي، چې مرستې دې د افرادو پرځای مرکزي حکومت او امنیتي نهادونو سره وکړي.
جنرال دوستم تېره اونې د سه شنبې په ورځ هغه مهال د دویم ځل له پاره شمال ته لاړه، چې وسله والو طالبانو پر غورماچ ولسوالۍ برید وکړ او دغه ولسوالي یې ونیوله.
